ಗಲ್ಫ್ ಪ್ರದೇಶದಲ್ಲಿ ನಡೆಯುತ್ತಿರುವ ಉದ್ವಿಗ್ನ ಪರಿಸ್ಥಿತಿಯ ನಡುವೆ ಟೆಲಿಕಾಂ du ಕಂಪನಿ ತನ್ನ ಗ್ರಾಹಕರಿಗಾಗಿ ವಿಶೇಷ ಸೌಲಭ್ಯವನ್ನು ಘೋಷಿಸಿದೆ. ವಿದೇಶದಲ್ಲಿ ಸಿಲುಕಿರುವ ಯುಎಇ ನಿವಾಸಿಗಳಿಗೆ 15GB ಉಚಿತ ರೋಮಿಂಗ್ ಡೇಟಾ ಹಾಗೂ ಅನಿಯಮಿತ ಔಟ್‌ಗೋಯಿಂಗ್ ಕರೆಗಳ ಸೌಲಭ್ಯವನ್ನು ಕಂಪನಿ ನೀಡುತ್ತಿದೆ.

ಕಂಪನಿಯ ಪ್ರಕಟಣೆಯ ಪ್ರಕಾರ, ಈ ವಿಶೇಷ ಆಫರ್ ಯುಎಇ ದೇಶಗಳಲ್ಲಿ ಇರುವ ಗ್ರಾಹಕರಿಗೆ ಅನ್ವಯವಾಗಲಿದೆ. ಇದರೊಂದಿಗೆ 500 ನಿಮಿಷಗಳ ಇನ್‌ಕಮಿಂಗ್ ಕರೆಗಳ ಸೌಲಭ್ಯ ಕೂಡ ನೀಡಲಾಗುತ್ತದೆ.

ಈ ಉಚಿತ ಆಫರ್ ಇಂದಿನಿಂದ (ಗುರುವಾರ) ಪ್ರಾರಂಭವಾಗಿ ಮೂರು ದಿನಗಳ ಕಾಲ ಮಾನ್ಯವಾಗಲಿದೆ ಎಂದು ಕಂಪನಿ ತಿಳಿಸಿದೆ.

ಇದಕ್ಕೂ ಮುನ್ನ ಬುಧವಾರ, ಗಲ್ಫ್ ಪ್ರದೇಶದಲ್ಲಿ ನಡೆಯುತ್ತಿರುವ ಸೈನಿಕ ಉದ್ವಿಗ್ನತೆಯ ನಡುವೆಯೂ ಕಂಪನಿಯ ಎಲ್ಲಾ ಮೂಲಸೌಕರ್ಯ ಹಾಗೂ ವ್ಯವಸ್ಥೆಗಳು ಸಾಮಾನ್ಯವಾಗಿ ಕಾರ್ಯನಿರ್ವಹಿಸುತ್ತಿವೆ ಎಂದು du ಕಂಪನಿ ಸ್ಪಷ್ಟಪಡಿಸಿದೆ.

ಈ ಕುರಿತು ಮಾತನಾಡಿದ ಕಂಪನಿಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಫಹಾದ್ ಅಲ್ ಹಸ್ಸವಿ “ನಮ್ಮ ಪ್ರಮುಖ ಆದ್ಯತೆ ಎಂದರೆ ಗ್ರಾಹಕರಿಗೆ ನಿರಂತರ ಸಂಪರ್ಕ ವ್ಯವಸ್ಥೆ ಒದಗಿಸುವುದು ಮತ್ತು ನಮ್ಮ ಕಾರ್ಯಾಚರಣೆಯ ಸ್ಥಿರತೆಯನ್ನು ಕಾಪಾಡುವುದು. ದೇಶದ ಪ್ರಮುಖ ಮೂಲಸೌಕರ್ಯದಲ್ಲಿ ನಮ್ಮ ಪಾತ್ರ ಮಹತ್ವದ್ದಾಗಿದೆ,” ಎಂದು ಹೇಳಿದ್ದಾರೆ.