ಅಬುಧಾಬಿ: ಫೆಬ್ರವರಿ 28ರಿಂದ ಆರಂಭವಾದ ಇರಾನ್‌ನ ಕ್ಷಿಪಣಿ ಹಾಗೂ ಡ್ರೋನ್ ದಾಳಿಗಳ ಹಿನ್ನೆಲೆಯಲ್ಲಿ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಭಾರೀ ಪ್ರಮಾಣದ ವಾಯು ರಕ್ಷಣಾ ಕಾರ್ಯಾಚರಣೆ ನಡೆಸಿದ್ದು, ಈ ತಡೆ ಕಾರ್ಯಾಚರಣೆಗಳಿಗೆ ಬಿಲಿಯನ್ ಡಾಲರ್ ಮಟ್ಟದ ವೆಚ್ಚವಾಗಿರುವುದಾಗಿ ರಕ್ಷಣಾ ವಿಶ್ಲೇಷಕರು ಅಂದಾಜಿಸಿದ್ದಾರೆ.  

ಅಮೆರಿಕಾ ಮತ್ತು ಇಸ್ರೇಲ್ ನಡೆಸಿದ ಸೈನಿಕ ದಾಳಿಗಳಿಗೆ ಪ್ರತಿಕ್ರಿಯೆಯಾಗಿ ಇರಾನ್ ಗಲ್ಫ್ ಪ್ರದೇಶದ ಹಲವು ದೇಶಗಳನ್ನು ಗುರಿಯಾಗಿಸಿಕೊಂಡು ಕ್ಷಿಪಣಿ ಹಾಗೂ ಡ್ರೋನ್ ದಾಳಿಗಳನ್ನು ನಡೆಸಿತು. ಇದರ ಭಾಗವಾಗಿ ಯುಎಇ ಮೇಲೂ ಹಲವು ದಾಳಿಗಳು ನಡೆದಿವೆ.  

ಯುಎಇ ರಕ್ಷಣಾ ಸಚಿವಾಲಯ ನೀಡಿದ ಮಾಹಿತಿಯ ಪ್ರಕಾರ, ಫೆಬ್ರವರಿ 28ರಿಂದ ಆರಂಭವಾದ ದಾಳಿಗಳ ಬಳಿಕ ದೇಶದ ವಾಯು ರಕ್ಷಣಾ ವ್ಯವಸ್ಥೆಗಳು ನೂರಾರು ಕ್ಷಿಪಣಿಗಳು ಹಾಗೂ ಡ್ರೋನ್‌ಗಳನ್ನು ಪತ್ತೆಹಚ್ಚಿ ಬಹುತೇಕವನ್ನು ಯಶಸ್ವಿಯಾಗಿ ತಡೆಗಟ್ಟಿವೆ. ಮೊದಲ ದಿನಗಳಲ್ಲೇ 137 ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ಮತ್ತು 209 ಡ್ರೋನ್‌ಗಳು ಪತ್ತೆಯಾಗಿದ್ದು, ಅವುಗಳಲ್ಲಿ ಬಹುತೇಕವನ್ನು ನಾಶಪಡಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.  

ಮುಂದಿನ ದಿನಗಳಲ್ಲಿ ದಾಳಿಗಳ ಪ್ರಮಾಣ ಇನ್ನಷ್ಟು ಹೆಚ್ಚಿದ್ದು, ಇತ್ತೀಚಿನ ಅಂಕಿಅಂಶಗಳ ಪ್ರಕಾರ 196 ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ಹಾಗೂ 1,072 ಡ್ರೋನ್‌ಗಳು ಪತ್ತೆಯಾಗಿದ್ದು, ಅವುಗಳಲ್ಲಿ ಬಹುತೇಕವನ್ನು ಯುಎಇ ರಕ್ಷಣಾ ವ್ಯವಸ್ಥೆಗಳು ತಡೆಗಟ್ಟಿವೆ ಎಂದು ವರದಿಗಳು ತಿಳಿಸಿವೆ.  

ವಿಶ್ಲೇಷಕರ ಪ್ರಕಾರ, ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳನ್ನು ತಡೆಯಲು ಬಳಸುವ ವಾಯು ರಕ್ಷಣಾ ಕ್ಷಿಪಣಿಗಳು ಅತ್ಯಂತ ದುಬಾರಿಯಾಗಿದ್ದು, ಪ್ರತಿಯೊಂದು ತಡೆ ಕಾರ್ಯಾಚರಣೆಯ ವೆಚ್ಚ ಲಕ್ಷಾಂತರದಿಂದ ಮಿಲಿಯನ್ ಡಾಲರ್‌ಗಳವರೆಗೆ ಇರಬಹುದು ಎನ್ನಲಾಗಿದೆ. ಎಮಿರೇಟ್ ಬ್ಯುಸಿನೆಸ್ ಮಾಧ್ಯಮ ಪ್ರಕಾರ ಇಲ್ಲಿಯವರೆಗೆ 2.2 ಬಿಲಿಯನ್ ಡಾಲರ್ ಹಣ ಈ ರಕ್ಷಣಾ ಕಾರ್ಯಕ್ಕೆ ಬಳಸಲಾಗಿದೆ ಎಂದು ತಿಳಿಸಲಾಗಿದೆ. 

ಯುಎಇ ಸರ್ಕಾರ ದೇಶದ ಭದ್ರತೆ ಮತ್ತು ನಿವಾಸಿಗಳ ಸುರಕ್ಷತೆಗಾಗಿ ಎಲ್ಲಾ ಅಗತ್ಯ ಕ್ರಮಗಳನ್ನು ಕೈಗೊಂಡಿದೆ.