ನವದೆಹಲಿ: ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA)ಯ ಪರೀಕ್ಷಾ ವ್ಯವಸ್ಥೆಯಲ್ಲಿ ಸಮಗ್ರ ಸುಧಾರಣೆ ತರಲು ಕೇಂದ್ರ ಸರ್ಕಾರ ಉನ್ನತ ಮಟ್ಟದ ಕಾರ್ಯಪಡೆಯನ್ನು (High Powered Task Force) ರಚಿಸಿದೆ.

ಪರೀಕ್ಷಾ ಪ್ರಕ್ರಿಯೆಯನ್ನು, ವಿಶೇಷವಾಗಿ ತಂತ್ರಜ್ಞಾನ ಬಳಕೆ, ಪಾರದರ್ಶಕತೆ, ಭದ್ರತೆ ಹಾಗೂ ವ್ಯವಸ್ಥೆಯ ಮೂಲಭೂತ ಸುಧಾರಣೆಗಳ ದೃಷ್ಟಿಯಿಂದ ಪುನರ್‌ರಚಿಸುವ ಉದ್ದೇಶದಿಂದ ವಿವಿಧ ಕ್ಷೇತ್ರಗಳ ಪರಿಣಿತರನ್ನು ಒಳಗೊಂಡ ಬಹುಶಾಖಾ ತಜ್ಞರ ಸಮಿತಿಯನ್ನು ಸರ್ಕಾರ ನೇಮಿಸಿದೆ.

ಕಾರ್ಯಪಡೆಯ ಪ್ರಮುಖ ಸದಸ್ಯರು:

ನಂದನ್ ನೀಲೆಕಣಿ – ತಂತ್ರಜ್ಞಾನ ತಜ್ಞ

ಎಸ್. ಸೋಮನಾಥ್ – ಇಸ್ರೋ ಮಾಜಿ ಅಧ್ಯಕ್ಷ

ತಪನ್ ಡೇಕಾ – ಗುಪ್ತಚರ ದಳ (IB) ಮಾಜಿ ನಿರ್ದೇಶಕ

ಪ್ರೊ. ವಿ. ಕಾಮಕೋಟಿ – ಐಐಟಿ ಮದ್ರಾಸ್ ನಿರ್ದೇಶಕ

ಅನಿತಾ ಕರ್ವಾಲ್ – ಮಾಜಿ ಶಿಕ್ಷಣ ಕಾರ್ಯದರ್ಶಿ

ಅಮೃತ್ ಲಾಲ್ ಮೀನಾ – ಲಾಜಿಸ್ಟಿಕ್ಸ್ ತಜ್ಞ

ಇತ್ತೀಚಿನ ದಿನಗಳಲ್ಲಿ ಎನ್‌ಟಿಎ ನಡೆಸುವ ವಿವಿಧ ರಾಷ್ಟ್ರೀಯ ಮಟ್ಟದ ಪರೀಕ್ಷೆಗಳ ಪಾರದರ್ಶಕತೆ ಹಾಗೂ ಭದ್ರತೆ ಕುರಿತು ವ್ಯಕ್ತವಾಗಿದ್ದ ಆತಂಕಗಳ ಹಿನ್ನೆಲೆಯಲ್ಲಿ ಈ ಕಾರ್ಯಪಡೆ ರಚಿಸಲಾಗಿದೆ. 

ತಂತ್ರಜ್ಞಾನ ಆಧಾರಿತ ಸುರಕ್ಷಿತ ಪರೀಕ್ಷಾ ವ್ಯವಸ್ಥೆ, ಪರೀಕ್ಷಾ ನಿರ್ವಹಣೆಯ ದಕ್ಷತೆ ಹಾಗೂ ಭವಿಷ್ಯದಲ್ಲಿ ಯಾವುದೇ ಅಕ್ರಮಗಳಿಗೆ ಅವಕಾಶವಿಲ್ಲದ ರೀತಿಯ ಬಲಿಷ್ಠ ವ್ಯವಸ್ಥೆ ರೂಪಿಸುವ ಕುರಿತು ಕಾರ್ಯಪಡೆ ಸರ್ಕಾರಕ್ಕೆ ಶಿಫಾರಸುಗಳನ್ನು ಸಲ್ಲಿಸಲಿದೆ.

ಈ ಕ್ರಮವು ದೇಶದ ಲಕ್ಷಾಂತರ ವಿದ್ಯಾರ್ಥಿಗಳಲ್ಲಿ ಪರೀಕ್ಷಾ ವ್ಯವಸ್ಥೆಯ ಮೇಲಿನ ವಿಶ್ವಾಸವನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿ ಪರಿಗಣಿಸಲಾಗಿದೆ ಎಂದು ಪ್ರಧಾನಿ ಮೋದಿ ವಿಡಿಯೋ ಮೂಲಕ ಜನತೆಗೆ ಸಂದೇಶ ಕಳುಹಿಸಿದ್ದಾರೆ.