ಮುಂಬೈ: ಜನಪ್ರಿಯ ಬ್ರ್ಯಾಂಡ್‌ಗಳ ಆಹಾರ ಉತ್ಪನ್ನಗಳ ತಯಾರಿಕಾ ಮತ್ತು ಎಕ್ಸ್‌ಪೈರಿ ದಿನಾಂಕಗಳನ್ನು ಬದಲಾಯಿಸುತ್ತಿದ್ದ ಆರೋಪದ ಮೇಲೆ ನವಿ ಮುಂಬೈನಲ್ಲಿ ದೊಡ್ಡ ಜಾಲವೊಂದು ಪತ್ತೆಯಾಗಿದೆ.

ಮಹಾರಾಷ್ಟ್ರದ ಆಹಾರ ಮತ್ತು ಔಷಧ ಆಡಳಿತ (FDA) ಹಾಗೂ ನವಿ ಮುಂಬೈ ಪೊಲೀಸರು ಜಂಟಿಯಾಗಿ ತುರಭೆ ಪ್ರದೇಶದಲ್ಲಿರುವ ಸಧನಾ ಎಂಟರ್‌ಪ್ರೈಸಸ್‌ನ ಗೋದಾಮಿನ ಮೇಲೆ ದಾಳಿ ನಡೆಸಿದ್ದಾರೆ.

ದಾಳಿ ವೇಳೆ ಲೇಸ್, ಕುರ್ಕುರಿ, ಬಿಂಗೋ, ಮ್ಯಾಗಿ, ನೂಡಲ್ಸ್, ನಾಕ್‌ಔಟ್ ಆಹಾರ ಪದಾರ್ಥಗಳು, ಥಮ್ಸ್ ಅಪ್, ಲಿಮ್ಕಾ ಸೇರಿದಂತೆ ಹಲವು ಜನಪ್ರಿಯ ಬ್ರ್ಯಾಂಡ್‌ಗಳ ಸುಮಾರು 4,942 ಕಾರ್ಟನ್‌ಗಳ ಉತ್ಪನ್ನಗಳುಪತ್ತೆಯಾಗಿವೆ. ಇವುಗಳ ಒಟ್ಟು ಮೌಲ್ಯ ಸುಮಾರು ₹75.21 ಲಕ್ಷ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಅಧಿಕಾರಿಗಳ ಪ್ರಕಾರ, ಕೆಲವು ಉತ್ಪನ್ನಗಳ ಮೂಲ ತಯಾರಿಕಾ ಮತ್ತು ಎಕ್ಸ್‌ಪೈರಿ ದಿನಾಂಕಗಳನ್ನು ರಾಸಾಯನಿಕ ಬಳಸಿ ಅಳಿಸಿ, ಇಂಕ್‌ಜೆಟ್ ಯಂತ್ರದ ಮೂಲಕ ಹೊಸ ದಿನಾಂಕಗಳನ್ನು ಮುದ್ರಿಸಲಾಗುತ್ತಿತ್ತು. ಕೆಲವು ಆಹಾರ ಉತ್ಪನ್ನಗಳ ಮೇಲಿನ ಪದಾರ್ಥಗಳು ಮತ್ತು ಪೌಷ್ಟಿಕಾಂಶದ ಮಾಹಿತಿಯ ಲೇಬಲ್‌ಗಳನ್ನೂ ಬದಲಾಯಿಸಿರುವುದು ಪತ್ತೆಯಾಗಿದೆ. 

ಈ ಉತ್ಪನ್ನಗಳ ಒಂದು ಭಾಗವನ್ನು ವಿದೇಶಗಳಿಗೆ ರಫ್ತು ಮಾಡಲು ಸಿದ್ಧಪಡಿಸಲಾಗುತ್ತಿತ್ತು ಎಂದು ತನಿಖೆಯಿಂದ ತಿಳಿದುಬಂದಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಫ್‌ಐಆರ್ ದಾಖಲಿಸಲಾಗಿದ್ದು, ಸಂಬಂಧಿತ ಸಂಸ್ಥೆಯ ಆಹಾರ ಪರವಾನಗಿಯನ್ನು ಅಮಾನತುಗೊಳಿಸಲಾಗಿದೆ. ತನಿಖೆ ಮುಂದುವರಿದಿದೆ. 

ಆಹಾರ ಉತ್ಪನ್ನಗಳ ಪ್ಯಾಕೆಟ್‌ಗಳ ಮೇಲಿನ ದಿನಾಂಕ ಹಾಗೂ ಲೇಬಲ್‌ಗಳನ್ನು ಬದಲಾಯಿಸುವುದು ಗ್ರಾಹಕರ ಆರೋಗ್ಯ ಮತ್ತು ಸುರಕ್ಷತೆಯ ದೃಷ್ಟಿಯಿಂದ ಗಂಭೀರ ವಿಷಯವಾಗಿದ್ದು, ಅಧಿಕಾರಿಗಳು ಈ ಪ್ರಕರಣದ ಬಗ್ಗೆ ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.