ಮಂಗಳೂರು/ಉಡುಪಿ: ಕರಾವಳಿ ಭಾಗದ ಹಳೆಯ ಸಾಂಪ್ರದಾಯಿಕ ಆಟವಾದ ‘ಪೆಟ್ಲ’ ಇದೀಗ ಸಾಮಾಜಿಕ ಜಾಲತಾಣಗಳ ಮೂಲಕ ಮತ್ತೊಮ್ಮೆ ಗಮನ ಸೆಳೆಯುತ್ತಿದೆ. ಶ್ರೀಕೃಷ್ಣ ಜನ್ಮಾಷ್ಟಮಿ ಹಾಗೂ ವಿಟ್ಲಪಿಂಡಿ ಉತ್ಸವದ ಸಂದರ್ಭಗಳಲ್ಲಿ ಈ ಆಟದ ಕುರಿತ ವಿಡಿಯೋಗಳು ಮತ್ತು ಮಾಹಿತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಯುವಜನರಲ್ಲೂ ಆಸಕ್ತಿ ಹೆಚ್ಚಾಗಿದೆ.
ಒಂದು ಕಾಲದಲ್ಲಿ ಕರಾವಳಿಯ ಮಕ್ಕಳಿಗೆ ಪರಿಚಿತವಾಗಿದ್ದ ಈ ಸಾಂಪ್ರದಾಯಿಕ ಆಟ, ಕಾಲಕ್ರಮೇಣ ಮರೆಯಾಗುವ ಹಂತಕ್ಕೆ ತಲುಪಿತ್ತು. ಇದೀಗ ಹಬ್ಬಗಳ ಸಂದರ್ಭದಲ್ಲಿ ಮತ್ತೆ ಕಾಣಿಸಿಕೊಳ್ಳುತ್ತಿರುವುದರಿಂದ ಹಳೆಯ ತಲೆಮಾರಿನವರಿಗೆ ಬಾಲ್ಯದ ನೆನಪುಗಳನ್ನು ಮೂಡಿಸುತ್ತಿದೆ.
ಸಾಮಾಜಿಕ ಜಾಲತಾಣಗಳ ಮೂಲಕ ಪೆಟ್ಲ ಆಟದ ಬಗ್ಗೆ ಹೊಸ ತಲೆಮಾರಿನವರಿಗೂ ಪರಿಚಯವಾಗುತ್ತಿರುವುದು ಕರಾವಳಿಯ ಪಾರಂಪರಿಕ ಸಂಸ್ಕೃತಿ ಮತ್ತು ಆಟಗಳಿಗೆ ಹೊಸ ಜೀವ ತುಂಬಿದಂತಾಗಿದೆ.
