ನವದೆಹಲಿ: ಯುಪಿಐ ಮೂಲಕ ನಡೆಯುವ ಹೆಚ್ಚಿನ ಮೊತ್ತದ ವಹಿವಾಟುಗಳಿಗೆ ವರ್ತಕರು ಶುಲ್ಕ ಪಾವತಿಸಬೇಕಾದ ಹೊಸ ನಿಯಮ ಜಾರಿಗೆ ಬರಲಿದೆ. ಅಕ್ಟೋಬರ್ 15ರಿಂದ ₹2,000ಕ್ಕಿಂತ ಹೆಚ್ಚಿನ ಯುಪಿಐ ಪಾವತಿಗಳಿಗೆ ಶೇ.0.4ರಷ್ಟು ಎಂಡಿಆರ್‌ (Merchant Discount Rate) ವಿಧಿಸಲಾಗುತ್ತದೆ. ಈ ಶುಲ್ಕ ಗ್ರಾಹಕರಿಗೆ ನೇರವಾಗಿ ಅನ್ವಯಿಸುವುದಿಲ್ಲ.

₹2,000ಕ್ಕಿಂತ ಕಡಿಮೆ ಮೊತ್ತದ ಯುಪಿಐ ವಹಿವಾಟುಗಳಿಗೆ ಯಾವುದೇ ಶುಲ್ಕ ಇರುವುದಿಲ್ಲ. ರುಪೇ ಡೆಬಿಟ್ ಕಾರ್ಡ್ ಮೂಲಕ ಈ ಮಿತಿಯೊಳಗೆ ನಡೆಯುವ ಪಾವತಿಗಳಿಗೂ ಶುಲ್ಕ ವಿಧಿಸಬಾರದು ಎಂದು ಕೇಂದ್ರ ಸರ್ಕಾರ ಸೂಚಿಸಿದೆ. ಇದರ ಬೆನ್ನಲ್ಲೇ ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (ಎನ್‌ಸಿಪಿಐ) ವರ್ತಕರಿಗೆ ಅನ್ವಯವಾಗುವ ಎಂಡಿಆರ್‌ ದರಗಳನ್ನು ಪ್ರಕಟಿಸಿದೆ.

ಹೊಸ ವ್ಯವಸ್ಥೆಯಲ್ಲಿ ₹2,000ಕ್ಕಿಂತ ಹೆಚ್ಚು ಮತ್ತು ₹75,000ವರೆಗೆ ನಡೆಯುವ ವಹಿವಾಟಿಗೆ ಶೇ.0.4ರಷ್ಟು ಶುಲ್ಕ ನಿಗದಿಯಾಗಿದೆ. ₹2,500 ಪಾವತಿಸಿದರೆ ₹10, ₹10,000ಕ್ಕೆ ₹40, ₹50,000ಕ್ಕೆ ₹200 ಹಾಗೂ ₹75,000ಕ್ಕೆ ₹300 ಶುಲ್ಕವಾಗಲಿದೆ. ₹75,000ಕ್ಕಿಂತ ಹೆಚ್ಚಿನ ಮೊತ್ತದ ಯಾವುದೇ ವಹಿವಾಟಿಗೂ ಗರಿಷ್ಠ ₹300 ಮಾತ್ರ ಶುಲ್ಕ ವಿಧಿಸಲಾಗುತ್ತದೆ. ಹೀಗಾಗಿ ₹1 ಲಕ್ಷ ಪಾವತಿಗೂ ₹300ರಷ್ಟೇ ಶುಲ್ಕ ಅನ್ವಯವಾಗಲಿದೆ.

ಇಂಧನ, ಟೆಲಿಕಾಂ ಮತ್ತು ರೈಲ್ವೆ ಕ್ಷೇತ್ರದ ವಹಿವಾಟುಗಳಿಗೆ ಹೆಚ್ಚಿನ ಶುಲ್ಕದ ಹೊರೆ ಬೀಳದಂತೆ ಏಕರೂಪವಾಗಿ ₹5 ಶುಲ್ಕ ನಿಗದಿಪಡಿಸಲಾಗಿದೆ.

ಗ್ರಾಹಕರಿಗೆ ಹೆಚ್ಚುವರಿ ಶುಲ್ಕವಿಲ್ಲ

ಎಂಡಿಆರ್‌ ಶುಲ್ಕವನ್ನು ವರ್ತಕರಿಂದಲೇ ವಸೂಲಿ ಮಾಡಲಾಗುತ್ತದೆ. ಗ್ರಾಹಕರು ಯುಪಿಐ ಮೂಲಕ ಪಾವತಿ ಮಾಡುವಾಗ ಪ್ರತ್ಯೇಕವಾಗಿ ಯಾವುದೇ ಶುಲ್ಕ ಪಾವತಿಸಬೇಕಾಗುವುದಿಲ್ಲ. ಆದರೆ ವರ್ತಕರು ಈ ವೆಚ್ಚವನ್ನು ಉತ್ಪನ್ನಗಳ ಬೆಲೆ ಹೆಚ್ಚಿಸುವ ಮೂಲಕ ಗ್ರಾಹಕರಿಗೆ ವರ್ಗಾಯಿಸಿದರೆ ಮಾತ್ರ ಪರೋಕ್ಷವಾಗಿ ಹೆಚ್ಚುವರಿ ಹೊರೆ ಬೀಳುವ ಸಾಧ್ಯತೆಯಿದೆ.

ವ್ಯಕ್ತಿಯಿಂದ ವ್ಯಕ್ತಿಗೆ ನಡೆಯುವ ಯುಪಿಐ ಹಣ ವರ್ಗಾವಣೆಗೆ ಈ ಶುಲ್ಕ ಅನ್ವಯಿಸುವುದಿಲ್ಲ. ಶುಲ್ಕವು ಗ್ರಾಹಕ ಮತ್ತು ವರ್ತಕರ ನಡುವಿನ ವಾಣಿಜ್ಯ ವಹಿವಾಟುಗಳಿಗೆ ಮಾತ್ರ ಸೀಮಿತವಾಗಿದೆ.

ಒಂದೇ ಬಿಲ್‌ಗೆ ಎರಡು ಪಾವತಿ ಮಾಡುವಂತಿಲ್ಲ

₹3,000 ಮೌಲ್ಯದ ವಸ್ತುವನ್ನು ಖರೀದಿಸಿದಾಗ ಎಂಡಿಆರ್‌ ತಪ್ಪಿಸಲು ₹1,500ರಂತೆ ಎರಡು ಪ್ರತ್ಯೇಕ ಯುಪಿಐ ಪಾವತಿಗಳನ್ನು ಮಾಡುವಂತೆ ವರ್ತಕರು ಗ್ರಾಹಕರಿಗೆ ಸೂಚಿಸುವಂತಿಲ್ಲ. ಬಿಲ್‌ನಲ್ಲಿರುವ ಒಟ್ಟು ಮೊತ್ತ ಮತ್ತು ಪಾವತಿಯಾಗುವ ಮೊತ್ತದ ನಡುವೆ ಹೊಂದಾಣಿಕೆ ಇರಬೇಕು ಎಂದು ಎನ್‌ಸಿಪಿಐ ಸೂಚಿಸಿದೆ.

ಬರ್ನ್‌ಸ್ಟೀನ್‌ ಸಂಸ್ಥೆಯ ಅಂದಾಜಿನ ಪ್ರಕಾರ, ಯುಪಿಐ ವಹಿವಾಟಿಗೆ ಶುಲ್ಕ ಜಾರಿಯಾದ ಬಳಿಕ 2028ರ ಹಣಕಾಸು ವರ್ಷದ ವೇಳೆಗೆ ಸುಮಾರು ₹22,000 ಕೋಟಿ ಆದಾಯ ಸಂಗ್ರಹವಾಗುವ ಸಾಧ್ಯತೆಯಿದೆ. ಹೊಸ ಶುಲ್ಕ ವ್ಯವಸ್ಥೆಯಿಂದ ಬ್ಯಾಂಕ್‌ಗಳು ಮತ್ತು ಪಾವತಿ ಸಂಸ್ಥೆಗಳಿಗೆ ಆದಾಯದ ಮೂಲ ಸಿಗಲಿದೆ ಎಂದು ವರದಿಯಾಗಿದೆ.