ಬೆಂಗಳೂರು: ಅಮೆರಿಕ ಮೂಲದ ಫಿನ್‌ಟೆಕ್ ಕಂಪನಿಯೊಂದರ ಭಾರತೀಯ ಕಸ್ಟಮರ್ ಸಪೋರ್ಟ್ ತಂಡದ ಸುಮಾರು 80 ಉದ್ಯೋಗಿಗಳನ್ನು ಕೇವಲ ಕೆಲವೇ ನಿಮಿಷಗಳ ಆನ್‌ಲೈನ್ ಸಭೆಯ ಮೂಲಕ ಕೆಲಸದಿಂದ ತೆಗೆದುಹಾಕಲಾಗಿದೆ ಎಂಬ ಆರೋಪ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.

Redditನಲ್ಲಿ ತನ್ನನ್ನು ಈ ತಂಡದ ಉದ್ಯೋಗಿ ಎಂದು ಪರಿಚಯಿಸಿಕೊಂಡ ವ್ಯಕ್ತಿಯೊಬ್ಬರು ಘಟನೆ ಕುರಿತು ಪೋಸ್ಟ್ ಮಾಡಿದ್ದು, ಅಮೆರಿಕದ ಡಿಜಿಟಲ್ ಬ್ಯಾಂಕಿಂಗ್ ಕಂಪನಿ Bluevine ತನ್ನ ಸಂಪೂರ್ಣ ಭಾರತೀಯ ಕಸ್ಟಮರ್ ಸಪೋರ್ಟ್ ತಂಡವನ್ನು ವಜಾಗೊಳಿಸಿದೆ ಎಂದು ಆರೋಪಿಸಿದ್ದಾರೆ. ಆದರೆ ಈ ಹೇಳಿಕೆಯನ್ನು ಕಂಪನಿಯು ಅಧಿಕೃತವಾಗಿ ದೃಢಪಡಿಸಿರುವುದಾಗಲಿ ಅಥವಾ ನಿರಾಕರಿಸಿರುವುದಾಗಲಿ ವರದಿಯಾಗಿಲ್ಲ.

ಮೊದಲು Work From Home ಸೂಚನೆ

ಉದ್ಯೋಗಿಯ ಹೇಳಿಕೆಯ ಪ್ರಕಾರ, ಘಟನೆಯ ದಿನ ಸಿಬ್ಬಂದಿಗೆ ‘Operational reasons’ ಕಾರಣ ನೀಡಿ ಕಚೇರಿಗೆ ಬರುವ ಬದಲು ಮನೆಯಿಂದಲೇ ಕೆಲಸ ಮಾಡುವಂತೆ ಸೂಚಿಸಲಾಗಿತ್ತು.

ಸಂಜೆ ಸುಮಾರು 6.30ಕ್ಕೆ ಕೆಲಸ ಆರಂಭಿಸಿದ್ದ ತಂಡಕ್ಕೆ, ರಾತ್ರಿ 9.30ರ ವೇಳೆಗೆ ಹಿರಿಯ ಅಧಿಕಾರಿಗಳಿಂದ Google Meet ಸಭೆಗೆ ಸೇರುವಂತೆ ಸೂಚನೆ ಬಂದಿತ್ತೆಂದು ಉದ್ಯೋಗಿ ಹೇಳಿದ್ದಾರೆ.

ಸಭೆ ಆರಂಭವಾದ ಕೆಲವೇ ನಿಮಿಷಗಳಲ್ಲಿ ಭಾರತದಲ್ಲಿರುವ ಸಂಪೂರ್ಣ ಕಸ್ಟಮರ್ ಸಪೋರ್ಟ್ ತಂಡದ ಉದ್ಯೋಗವನ್ನು ಕೊನೆಗೊಳಿಸಲಾಗುತ್ತಿದೆ ಎಂದು ತಿಳಿಸಲಾಯಿತು ಎನ್ನಲಾಗಿದೆ. ಸುಮಾರು 80 ಉದ್ಯೋಗಿಗಳುಈ ನಿರ್ಧಾರದಿಂದ ಪ್ರಭಾವಿತರಾಗಿದ್ದಾರೆ ಎಂದು ಅವರು ಹೇಳಿದ್ದಾರೆ. 

ಕಾರ್ಯಕ್ಷಮತೆ ಕಾರಣವೇ?

ಉದ್ಯೋಗಿಯ ಹೇಳಿಕೆಯ ಪ್ರಕಾರ, ನಿರೀಕ್ಷಿತ ಮಟ್ಟದ ಕಾರ್ಯಕ್ಷಮತೆ ಅಥವಾ ಔಟ್‌ಪುಟ್ ಸಾಧಿಸಲು ತಂಡ ವಿಫಲವಾಗಿದೆ ಎಂಬ ಕಾರಣವನ್ನು ನಿರ್ವಹಣಾ ತಂಡ ನೀಡಿದೆ ಎನ್ನಲಾಗಿದೆ.

ಆದರೆ ಉದ್ಯೋಗಿಯು ಈ ಕಾರಣವನ್ನು ಪ್ರಶ್ನಿಸಿದ್ದು, ತಂಡದ ಸದಸ್ಯರು ಉದ್ಯೋಗ ಭದ್ರತೆಯ ಆತಂಕದ ನಡುವೆಯೂ ತಮ್ಮ ಕಾರ್ಯಕ್ಷಮತೆಯನ್ನು ಕಾಯ್ದುಕೊಳ್ಳಲು ಹೆಚ್ಚಿನ ಪ್ರಯತ್ನ ಮಾಡುತ್ತಿದ್ದರು ಎಂದು ಹೇಳಿಕೊಂಡಿದ್ದಾರೆ. 

ಕೇವಲ ಕೆಲವೇ ನಿಮಿಷಗಳ ಆನ್‌ಲೈನ್ ಸಭೆಯಲ್ಲಿ ಇಷ್ಟು ದೊಡ್ಡ ಸಂಖ್ಯೆಯ ಉದ್ಯೋಗಿಗಳ ಉದ್ಯೋಗ ಅಂತ್ಯಗೊಂಡಿದೆ ಎಂಬ ಆರೋಪ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.