ಭಾವನಗರ: ಲಿವ್‌ಇನ್ ಸಂಗಾತಿಯನ್ನು ಹತ್ಯೆ ಮಾಡಿದ ಆರೋಪ ಎದುರಿಸುತ್ತಿರುವ ಯುವಕನನ್ನು ಪೊಲೀಸರು ಹತ್ಯೆ ನಡೆದ ಬಸ್‌ ನಿಲ್ದಾಣದಲ್ಲೇ ಥಳಿಸಿರುವ ಘಟನೆ ಗುಜರಾತ್‌ನ ಭಾವನಗರದಲ್ಲಿ ನಡೆದಿದೆ. ಪೊಲೀಸರು ಆರೋಪಿಯನ್ನು ಕೋಲುಗಳಿಂದ ಹೊಡೆಯುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಪೊಲೀಸರ ಕ್ರಮದ ಬಗ್ಗೆ ಚರ್ಚೆ ಶುರುವಾಗಿದೆ.

ಫೈಸಲ್ ಅಲಿಯಾಸ್ ಖಟ್ಟಿ ಲಖಾನಿ ಎಂಬ 20 ವರ್ಷದ ಆರೋಪಿಯನ್ನು ಶನಿವಾರ ಹಗ್ಗಗಳಿಂದ ಕಟ್ಟಿಕೊಂಡು ಸ್ಥಳಕ್ಕೆ ಕರೆದೊಯ್ದ ಪೊಲೀಸರು, ಬಳಿಕ ಆತನಿಗೆ ಲಾಠಿಯಿಂದ ಹೊಡೆದಿದ್ದಾರೆ. ಹತ್ಯೆಯ ಘಟನೆ ಅತ್ಯಂತ ಕ್ರೂರವಾಗಿದ್ದ ಹಿನ್ನೆಲೆಯಲ್ಲಿ ಕಠಿಣ ಕ್ರಮ ಕೈಗೊಳ್ಳಬೇಕಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಪ್ರಕರಣದಿಂದ ಪೊಲೀಸ್ ಇಲಾಖೆಯ ವರ್ಚಸ್ಸಿಗೆ ಧಕ್ಕೆಯಾಗಿದ್ದು, ಸಾರ್ವಜನಿಕರಲ್ಲಿ ಪೊಲೀಸರ ಮೇಲಿನ ನಂಬಿಕೆ ಕುಸಿದಿದೆ. ಹೀಗಾಗಿ ಹೆಚ್ಚುವರಿ ಕಠಿಣ ಕ್ರಮ ಅನಿವಾರ್ಯವಾಯಿತು ಎಂದು ಪೊಲೀಸ್ ಇನ್‌ಸ್ಪೆಕ್ಟರ್ ಹೇಳಿದ್ದಾರೆ.

ಏನಿದು ಘಟನೆ?

ಸೆಪ್ಟೆಂಬರ್ 3ರಂದು ಭಾವನಗರದ ಬಸ್‌ ನಿಲ್ದಾಣದಲ್ಲಿ 40 ವರ್ಷದ ಕಾಜಲ್‌ಬೆನ್ ಬರೈಯಾ ಮೇಲೆ ಹಲ್ಲೆ ನಡೆದಿತ್ತು. ಹಲವು ವರ್ಷಗಳಿಂದ ಕಾಜಲ್‌ಬೆನ್ ಅವರೊಂದಿಗೆ ವಾಸಿಸುತ್ತಿದ್ದ ಫೈಸಲ್ ಅಲಿಯಾಸ್ ಖಟ್ಟಿ ಲಖಾನಿಯೇ ಹಲ್ಲೆ ನಡೆಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಾಜಲ್‌ಬೆನ್ ಮತ್ತು ಅವರ ಸ್ನೇಹಿತ ರವಿ ಗೋಹಿಲ್ ಅವರೊಂದಿಗೆ ಫೈಸಲ್ ಜಗಳವಾಡಿದ್ದ. ಕಾಜಲ್‌ಬೆನ್ ಹಾಗೂ ರವಿ ನಡುವೆ ಸಂಬಂಧವಿದೆ ಎಂಬ ಅನುಮಾನ ಫೈಸಲ್‌ಗೆ ಇತ್ತು ಎಂದು ಪೊಲೀಸರು ಹೇಳಿದ್ದಾರೆ. ಆದರೆ ವಿಚಾರಣೆ ವೇಳೆ ರವಿ, ಜಗಳಕ್ಕೆ ಮದ್ಯ ಸೇವನೆಯೇ ಕಾರಣ ಎಂದು ತಿಳಿಸಿದ್ದಾನೆ.

ಜಗಳ ತೀವ್ರಗೊಂಡ ಬಳಿಕ ಫೈಸಲ್ ಕಾಜಲ್‌ಬೆನ್ ಅವರನ್ನು ಕೆಳಕ್ಕೆ ಬೀಳಿಸಿ, ತಲೆ ಸೇರಿದಂತೆ ದೇಹದ ವಿವಿಧ ಭಾಗಗಳಿಗೆ ಕಾಲಿನಿಂದ ಒದ್ದು ಹಾಗೂ ಗುದ್ದಿದ್ದಾನೆ ಎಂದು ಪೊಲೀಸರು ಆರೋಪಿಸಿದ್ದಾರೆ. ಗಂಭೀರವಾಗಿ ಗಾಯಗೊಂಡಿದ್ದ ಕಾಜಲ್‌ಬೆನ್ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಸೆಪ್ಟೆಂಬರ್ 4ರಂದು ಮೃತಪಟ್ಟಿದ್ದಾರೆ.

ಕಾಜಲ್‌ಬೆನ್ ಅವರ ತಾಯಿ ನೀಡಿದ ದೂರಿನ ಆಧಾರದ ಮೇಲೆ ಫೈಸಲ್ ವಿರುದ್ಧ ಪೊಲೀಸರು ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಸಿಸಿಟಿವಿಯಲ್ಲಿ ಹಲ್ಲೆ ದೃಶ್ಯ ಸೆರೆ

ಬಸ್‌ ನಿಲ್ದಾಣದಲ್ಲಿದ್ದ ಸಿಸಿಟಿವಿ ಕ್ಯಾಮೆರಾಗಳಲ್ಲಿ ಹಲ್ಲೆಯ ದೃಶ್ಯಗಳು ದಾಖಲಾಗಿವೆ. ಹಲವು ನಿಮಿಷಗಳ ಕಾಲ ಹಲ್ಲೆ ನಡೆದಿದ್ದು, ಸುತ್ತಮುತ್ತ ಇದ್ದ ಜನರು ಘಟನೆಯನ್ನು ನೋಡುತ್ತಿರುವುದು ಕೂಡ ಸಿಸಿಟಿವಿ ದೃಶ್ಯಗಳಲ್ಲಿ ಕಂಡುಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ತನಿಖೆಯ ಭಾಗವಾಗಿ ಪೊಲೀಸರು ಸಿಸಿಟಿವಿ ದೃಶ್ಯಗಳು, ಸಾಕ್ಷಿಗಳ ಹೇಳಿಕೆಗಳು, ವೈದ್ಯಕೀಯ ದಾಖಲೆಗಳು ಮತ್ತು ಮರಣೋತ್ತರ ಪರೀಕ್ಷೆಯ ವರದಿ ಸೇರಿದಂತೆ ವಿವಿಧ ಸಾಕ್ಷ್ಯಗಳನ್ನು ಸಂಗ್ರಹಿಸುತ್ತಿದ್ದಾರೆ.

ಆರೋಪಿಗೆ ಈ ಹಿಂದೆಯೂ ಅಪರಾಧ ಪ್ರಕರಣಗಳು

ಫೈಸಲ್ ವಿರುದ್ಧ ಈ ಹಿಂದೆ ದರೋಡೆ ಮತ್ತು ಹಲ್ಲೆಗೆ ಸಂಬಂಧಿಸಿದ ಪ್ರಕರಣಗಳು ದಾಖಲಾಗಿದ್ದವು ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. ಇದೀಗ ಕಾಜಲ್‌ಬೆನ್ ಹತ್ಯೆಗೆ ಕಾರಣವಾದ ಸಂಪೂರ್ಣ ಹಿನ್ನೆಲೆ, ಜಗಳದ ಕಾರಣ ಹಾಗೂ ಆರೋಪಿಯ ವಿರುದ್ಧ ಇರುವ ಸಾಕ್ಷ್ಯಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ.