ಮಂಗಳೂರು: ಬೀಡಿ ನೀಡುವಂತೆ ಒತ್ತಾಯಿಸಿ ವಿಚಾರಣಾಧೀನ ಕೈದಿಯೊಬ್ಬ ಮಂಗಳೂರು ಜಿಲ್ಲಾ ಕಾರಾಗೃಹದಲ್ಲಿ ಗಲಾಟೆ ನಡೆಸಿ, ಅಧಿಕಾರಿಗಳಿಗೆ ಬೆದರಿಕೆ ಹಾಕಿರುವ ಘಟನೆ ನಡೆದಿದೆ. ಘಟನೆಗೆ ಸಂಬಂಧಿಸಿದಂತೆ ಬರ್ಕೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸೆಪ್ಟೆಂಬರ್ 14ರಂದು ಬೆಳಗ್ಗೆ ಮೊಹಮ್ಮದ್ ಫೈಜಲ್ ಎಂಬ ಕೈದಿ ಕಾರಾಗೃಹದ ಅಡುಗೆಮನೆಗೆ ತೆರಳಿ, ಅಲ್ಲಿನ ಕೆಲಸಗಾರರಿಗೆ ಅಧೀಕ್ಷಕರು ಬೀಡಿ ನೀಡುವವರೆಗೆ ಅಡುಗೆ ಮಾಡದಂತೆ ಒತ್ತಾಯಿಸಿದ್ದಾನೆ ಎನ್ನಲಾಗಿದೆ. ಇದರಿಂದ ಅಡುಗೆ ಕೆಲಸಕ್ಕೆ ಅಡ್ಡಿಯುಂಟಾಗಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಬಳಿಕ ಕೆಲ ಸಹ ಕೈದಿಗಳನ್ನು ತನ್ನೊಂದಿಗೆ ಕರೆದುಕೊಂಡು ಅಧೀಕ್ಷಕರ ಕಚೇರಿಗೆ ತೆರಳಿದ ಫೈಜಲ್, ಬೀಡಿ ನೀಡದಿದ್ದರೆ ಅಡುಗೆ ತಯಾರಿಸಲು ಅವಕಾಶ ನೀಡುವುದಿಲ್ಲ ಎಂದು ಬೆದರಿಕೆ ಹಾಕಿದ್ದಾನೆ ಎನ್ನಲಾಗಿದೆ. ಅಡುಗೆ ಮಾಡಿದರೆ ಆಹಾರದಲ್ಲಿ ಹಲ್ಲಿ ಅಥವಾ ಜಿರಳೆ ಹಾಕಿ ಗಲಾಟೆ ಸೃಷ್ಟಿಸುವುದಾಗಿ ಹಾಗೂ ಅಧಿಕಾರಿಗಳ ವರ್ಗಾವಣೆಗೆ ಕಾರಣವಾಗುವುದಾಗಿ ಬೆದರಿಸಿದ್ದಾನೆ ಎಂದು ಆರೋಪಿಸಲಾಗಿದೆ.

ಅಡುಗೆಮನೆಯ ಗೇಟ್‌ಗೆ ಬೀಗ ಹಾಕಿದ ನಂತರವೂ ಗಲಾಟೆ ಮುಂದುವರಿಸಿದ ಆತ, ಅಲ್ಲಿದ್ದ ಅನಿಲ ಸಿಲಿಂಡರ್ ಬಳಸಿ ಗೇಟ್ ಮತ್ತು ಬೀಗದ ಕೀಗೆ ಹೊಡೆದಿದ್ದಾನೆ ಎನ್ನಲಾಗಿದೆ. ಬೀಗ ತೆರೆಯುವಂತೆ ಕೂಗಾಡಿದ ಆತ, ಅನಿಲ ಸಿಲಿಂಡರ್ ಸ್ಫೋಟಿಸುವುದಾಗಿ ಕೂಡ ಬೆದರಿಕೆ ಹಾಕಿದ್ದಾನೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಇದಲ್ಲದೆ, ಬೀಡಿ ನೀಡುವವರೆಗೆ ಕೊಠಡಿಗಳಿಗೆ ತೆರಳದಂತೆ ಇತರ ಕೈದಿಗಳನ್ನು ಪ್ರಚೋದಿಸಿ, ಜೋರಾಗಿ ಕೂಗಾಡುತ್ತಾ ಜೈಲು ಸಿಬ್ಬಂದಿಯ ಕರ್ತವ್ಯಕ್ಕೆ ಅಡ್ಡಿಪಡಿಸಿದ್ದಾನೆ ಎಂಬ ಆರೋಪವೂ ಕೇಳಿಬಂದಿದೆ. ಈ ಹಿನ್ನೆಲೆಯಲ್ಲಿ ಬರ್ಕೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.