ಇಂದು ನೀರ್‌ ದೋಸೆಯನ್ನು ನೋಡಿ “ವಾಹ್!” ಎನ್ನುತ್ತೇವೆ. ಆದರೆ ಅದರ ಹಿಂದೆ ಕರಾವಳಿಯ ಬಡತನ, ದೊಡ್ಡ ಕುಟುಂಬಗಳ ಹಸಿವು, ಮತ್ತು ಒಂದು ಚಿಕ್ಕ ಆವಿಷ್ಕಾರದ ಪ್ರೀತಿ ಇರುತ್ತದೆ ಎನ್ನುವುದು ನಿಮಗೆ ಗೊತ್ತಿದೆಯೇ?

ಹೌದು, ಹಿರಿಯರ ಪ್ರಕಾರ ಕರಾವಳಿ ಕರ್ನಾಟಕದ ಮನೆಮನೆಗಳಲ್ಲಿ ಇಂದು ನಾವು ಸವಿಯುವ “ನೀರ್‌ ದೋಸೆ”ಗೆ ಒಂದು ಸ್ಪರ್ಶಿಸುವ ಇತಿಹಾಸ ಇದೆ. ಹಿಂದಿನ ಕಾಲದಲ್ಲಿ ಕರಾವಳಿ ಪ್ರದೇಶಗಳಲ್ಲಿ ಅವಿಭಕ್ತ ಕುಟುಂಬ ವ್ಯವಸ್ಥೆ ಸಾಮಾನ್ಯ. ಒಂದೇ ಮನೆಯಲ್ಲಿ 80–100 ಜನರವರೆಗೆ ಬದುಕುವುದು ಸಹಜ.

ಅಂದರೆ, ಜನ ಹೆಚ್ಚು – ಸಂಪತ್ತು ಕಡಿಮೆ ಎಂಬುದು ಅವರ ನಿತ್ಯ ಜೀವನ. ಕೆಲವೊಮ್ಮೆ ಒಂದು ಕೆಜಿ ಅಕ್ಕಿಯಿಂದಲೇ ನೂರಕ್ಕೂ ಹೆಚ್ಚು ಜನರಿಗೆ ಆಹಾರ ಒದಗಿಸಬೇಕಾದ ಕಷ್ಟಕರ ಪರಿಸ್ಥಿತಿ ಎದುರಾಗುತ್ತಿತ್ತು. ಆಗ ಹುಟ್ಟಿತು ಒಂದು ಹೊಸ ಕಲ್ಪನೆ ಅದೇ ನೀರು ದೋಸೆ ಎನ್ನುತ್ತಾರೆ ಹಿರಿಯರು.

ಅಕ್ಕಿಯನ್ನು ಹೀಗೆ ಬೇಯಿಸಿದರೆ ಸಾಕಾಗುವುದಿಲ್ಲ. ರುಬ್ಬಿ, ತೆಳ್ಳಗೆ ಹಿಟ್ಟನ್ನ ಮಾಡಿ ದೋಸೆ ಮಾಡಿದ್ರೆ ಹೇಗೆ?” ಕಡಿಮೆ ಅಕ್ಕಿಯಲ್ಲಿ ಹೆಚ್ಚು ದೋಸೆ ಮತ್ತು ಎಲ್ಲರಿಗೂ ದೊರೆಕುವ ಆಹಾರ ಎಂಬ ಪರಿಕಲ್ಪನೆಗೆ ಬಂದಿದ್ದಾರೆ ಪೂರ್ವಜರು. ಆ ಮೂಲಕ ಅಕ್ಕಿ ಮತ್ತು ನೀರಿನಷ್ಟೇ ಬೇಕಾದ ಈ ದೋಸೆ ತೆಳ್ಳಗೆ, ಮೃದುವಾಗಿ, ಹೆಚ್ಚಿನ ಸಂಖ್ಯೆಯಲ್ಲಿ ತಯಾರಾಗುತ್ತಿತ್ತು. ಆ ದಿನದಿಂದಲೇ ಕರಾವಳಿ ಮನೆಯ ಅಡುಗೆಮನೆಗಳಲ್ಲಿ ಜನಿಸಿದ ಈ ವಿಶಿಷ್ಟ ಆಹಾರಕ್ಕೆ ಹೆಸರಾಯಿತು “ನೀರ್‌ ದೋಸೆ”. 

ಬೆಳ್ಳಗೆ–ತೆಳ್ಳಗೆ–ಮೃದುವಾಗಿರುವ ನೀರುದೋಸೆ ಚಟ್ನಿ ಇಲ್ಲವೇ ಮೀನು ಅಥವಾ ಕೋಳಿ ಸಾರು ಜೊತೆ ತಿಂದಾಗ ಅದರ ಸವಿಯೇ ಸುಂದರ.