ಮುಖದ ಅಂದ ಹೆಚ್ಚಿಸುವಲ್ಲಿ ತುಟಿ ಮುಖ್ಯ ಪಾತ್ರ ವಹಿಸುತ್ತದೆ. ಗುಲಾಬಿ ರಂಗಿನ ತುಟಿಗಳು ಚಳಿಗಾಲ ಬಂತೆಂದರೆ ಸಾಕು ಹೆದರಿ ಬಾಡಿ ಹೋಗುತ್ತವೆ. ಕೊರೆಯುವ ಚಳಿ ಮತ್ತು ಒಣ ಗಾಳಿ ನಮ್ಮ ಸೂಕ್ಷ್ಮ ತುಟಿಯ ಮೇಲೆ ಹಾನಿಯನ್ನುಂಟುಮಾಡುತ್ತದೆ. ತುಟಿಗಳು ಒಣಗಿ, ಬಿರುಕು ಬಿಡುತ್ತದೆ ಮತ್ತು ಸಿಪ್ಪೆ ಏಳುತ್ತದೆ, ಇದು ತೀವ್ರ ನೋವನ್ನುಂಟುಮಾಡುತ್ತದೆ ಮಾತ್ರವಲ್ಲ ನಮ್ಮ ಮುಖದ ಅಂದವನ್ನು ಹಾಳುಮಾಡುತ್ತದೆ. ಹಾಗಾದರೆ ಒಡೆದ ತುಟಿಗಳು ಸರಿಪಡಿಸಿಕೊಳ್ಳಲು ಏನು ಮಾಡಬಹುದು ಎನ್ನುವ ಟಿಪ್ಸ್‌ ಇಲ್ಲಿದೆ ನೋಡಿ.

ಅಲೋವೆರಾ ಜೆಲ್‌

ತುಟಿಗಳ ಆರೋಗ್ಯ ಕಾಪಾಡಿಕೊಳ್ಳಲು ಅಲೋವೆರಾ ಜೆಲ್‌ ಅತ್ಯುತ್ತಮ ಮನೆಮದ್ದಾಗಿದೆ. ಆದಷ್ಟು ತಾಜಾ ಅಲೋವೆರಾ ಬಳಕೆ ಮಾಡಿದರೆ ಒಳ್ಳೆಯದು. ತಾಜಾ ಅಲೋವೆರಾವನ್ನು ಒಡೆದ ತುಟಿಗಳ ಮೇಲೆ ಹಚ್ಚುವುದರಿಂದ ಉರಿ ಕಡಿಮೆಯಾಗುತ್ತದೆ. ಅಲ್ಲದೆ ತುಟಿ ಒಡೆದಿರುವುದು ಸರಿಯಾಗುತ್ತದೆ.

ಸಕ್ಕರೆ

ಒಡೆದ ತುಟಿ, ಒಣ ಚರ್ಮದ ತುಟಿಯ ಸಮಸ್ಯೆಗಳಿಗೆ ಸಕ್ಕರೆ ಉತ್ತಮ ಮದ್ದಾಗಿದೆ. ಸಕ್ಕರೆಯನ್ನು ತುಟಿಗೆ ಹಚ್ಚಿಕೊಂಡು ಒಂದೈದು ನಿಮಿಷ ಹಾಗೆಯೇ ಬಿಡಿ. ನಂತರ ನಿಧಾನವಾಗಿ ಉಜ್ಜಿಕೊಳ್ಳಿ. ಇದರಿಂದ ತುಟಿಯ ಮೇಲಿನ ಒಣ ಚರ್ಮ ಕಿತ್ತು ಬರುತ್ತದೆ. ನಂತರ ತೊಳೆದುಕೊಂಡು ಕೊಬ್ಬರಿ ಎಣ್ಣೆ ಅಥವಾ ಅಲೋವೆರಾ ಜೆಲ್ ಹಚ್ಚಿ. ಇದರಿಂದ ತುಟಿಗೆ ನೈಸರ್ಗಿಕ ಸ್ಕೃಬ್‌ ಆದಂತಾಗುತ್ತದೆ.

ತೆಂಗಿನ ಎಣ್ಣೆ ಮತ್ತು ಜೇನು ತುಪ್ಪ

ಒಂದು ಬಟ್ಟಲಿನಲ್ಲಿ 1 ಚಮಚ ತೆಂಗಿನ ಎಣ್ಣೆ ಮತ್ತು ಜೇನುತುಪ್ಪವನ್ನು ಬೆರೆಸಿ ರಾತ್ರಿ ಮಲಗುವ ಮುನ್ನ ಒಡೆದ ತುಟಿಗಳಿಗೆ ಹಚ್ಚಿ. ಬೆಳಿಗ್ಗೆ ಎದ್ದ ತಕ್ಷಣ ನೀರಿನಿಂದ ತುಟಿಗಳನ್ನು ತೊಳೆಯಿರಿ. ಹೀಗೆ ಮಾಡುತ್ತಾ ಬಂದರೆ ತುಟಿ ಒಡೆಯುವುದು ನಿಂತು ಮೃದುವಾಗುತ್ತವೆ.

ಸೌತೆಕಾಯಿ

ಸೌತೆಕಾಯಿ ಒಣ ತುಟಿಗಳಿಗೆ ತೇವಾಂಶ ನೀಡಲು ಸಹಾಯ ಮಾಡುತ್ತದೆ. ಒಡೆದ ತುಟಿಗಳಿಗೆ ಸೌತೆಕಾಯಿ ತುಂಡನ್ನು ಚೆನ್ನಾಗಿ ಉಜ್ಜಿದರೆ ಬೇಗನೆ ಮೃದುವಾಗುತ್ತವೆ.

ಆದರೆ ಮುಖ್ಯವಾದ ಸಂಗತಿಯೆಂದರೆ ನೀರು ಕುಡಿಯುವಾಗ ಬಾಟಲಿ ಅಥವಾ ಲೋಟವನ್ನು ಬಾಯಿಗೆ ಕಚ್ಚಿ ಅಂದರೆ ತುಟಿಗೆ ನೀರು ತಾಗುವ ಹಾಗೆ ಮಾಡಿ ಕುಡಿಯಿರಿ. ಇದರಿಂದ ತುಟಿ ಒಡೆಯುವ ಸಮಸ್ಯೆ ನಿವಾರಣೆಯಾಗುತ್ತದೆ.