ಮಂಗಳೂರು: ಸಮುದ್ರಾಹಾರ ರಫ್ತು ಕ್ಷೇತ್ರದಲ್ಲಿ ಭಾರತ ಮತ್ತೊಮ್ಮೆ ಗಮನಾರ್ಹ ಸಾಧನೆ ಮಾಡಿದ್ದು, 2025-26ನೇ ಹಣಕಾಸು ವರ್ಷದಲ್ಲಿ 19.72 ಲಕ್ಷ ಮೆಟ್ರಿಕ್ ಟನ್ ಮೀನು ಮತ್ತು ಸಂಬಂಧಿತ ಉತ್ಪನ್ನಗಳನ್ನು ವಿದೇಶಗಳಿಗೆ ರಫ್ತು ಮಾಡುವ ಮೂಲಕ ಹೊಸ ದಾಖಲೆ ನಿರ್ಮಿಸಿದೆ. ಈ ರಫ್ತಿನ ಒಟ್ಟು ಮೌಲ್ಯ ₹73,890.46 ಕೋಟಿಗೆ ತಲುಪಿದ್ದು, ದೇಶದ ಕೃಷಿ ಆಧಾರಿತ ರಫ್ತು ವಲಯಕ್ಕೆ ಮಹತ್ವದ ಕೊಡುಗೆ ನೀಡಿದೆ.

ಭಾರತದ ಸಮುದ್ರಾಹಾರ ರಫ್ತು ಆದಾಯದಲ್ಲಿ ಶೀತಲೀಕೃತ ಸಿಗಡಿ ಅತಿದೊಡ್ಡ ಪಾಲು ಹೊಂದಿದ್ದು, ಒಟ್ಟು ಗಳಿಕೆಯ ಸುಮಾರು 66 ಶೇಕಡಾ ಭಾಗವನ್ನು ತನ್ನದಾಗಿಸಿಕೊಂಡಿದೆ. ಇದರ ಬಳಿಕ ಶೀತಲೀಕೃತ ಮೀನು, ಸ್ಕ್ವಿಡ್ ಹಾಗೂ ಕಟ್ಲ್‌ಫಿಶ್ ಪ್ರಮುಖ ರಫ್ತು ಉತ್ಪನ್ನಗಳಾಗಿ ಗುರುತಿಸಿಕೊಂಡಿವೆ.

ಭಾರತೀಯ ಸಮುದ್ರಾಹಾರಕ್ಕೆ ಅಮೆರಿಕ ಪ್ರಮುಖ ಆಮದುದಾರ ರಾಷ್ಟ್ರವಾಗಿದ್ದು, ಚೀನಾ ಎರಡನೇ ಸ್ಥಾನದಲ್ಲಿದೆ. ಜೊತೆಗೆ ಯುರೋಪಿಯನ್ ಒಕ್ಕೂಟದ ರಾಷ್ಟ್ರಗಳು, ಆಗ್ನೇಯ ಏಷ್ಯಾದ ದೇಶಗಳು ಮತ್ತು ಜಪಾನ್ ಕೂಡ ಪ್ರಮುಖ ಮಾರುಕಟ್ಟೆಗಳಾಗಿವೆ. ಭಾರತವು ತನ್ನ ಸಮುದ್ರಾಹಾರ ರಫ್ತು ಜಾಲವನ್ನು 75ಕ್ಕೂ ಹೆಚ್ಚು ರಾಷ್ಟ್ರಗಳಿಗೆ ವಿಸ್ತರಿಸಿರುವುದು ಗಮನಾರ್ಹವಾಗಿದೆ.

ಮೀನು ಉತ್ಪಾದನೆಯಲ್ಲಿ ಭಾರತ ವಿಶ್ವದ ಮುಂಚೂಣಿ ರಾಷ್ಟ್ರಗಳಲ್ಲಿ ಒಂದಾಗಿದೆ. ದೇಶದಲ್ಲಿ ವರ್ಷಕ್ಕೆ ಸುಮಾರು 1.97 ಕೋಟಿ ಟನ್ ಮೀನು ಉತ್ಪಾದನೆಯಾಗುತ್ತಿದ್ದು, ಅದರಲ್ಲಿ ಸುಮಾರು 35.70 ಲಕ್ಷ ಟನ್ ಸಮುದ್ರ ಮೀನುಗಾರಿಕೆಯಿಂದ ಹಾಗೂ 1.61 ಕೋಟಿ ಟನ್‌ಗಿಂತ ಹೆಚ್ಚು ಪ್ರಮಾಣದ ಮೀನು ಮೀನುಕೃಷಿ ಚಟುವಟಿಕೆಗಳಿಂದ ಲಭ್ಯವಾಗುತ್ತಿದೆ. ಮೀನುಕೃಷಿ ಕ್ಷೇತ್ರದಲ್ಲಿ ಭಾರತ ವಿಶ್ವದ ಎರಡನೇ ಅತಿದೊಡ್ಡ ರಾಷ್ಟ್ರವಾಗಿದ್ದು, ವರ್ಷಕ್ಕೆ ಸರಾಸರಿ 8 ಶೇಕಡಾ ಬೆಳವಣಿಗೆಯನ್ನು ದಾಖಲಿಸುತ್ತಿದೆ.

ದೇಶದ ಜಲಸಂಪತ್ತಿನಲ್ಲಿ ಅಪಾರ ಜೀವವೈವಿಧ್ಯ ಕಂಡುಬರುತ್ತಿದ್ದು, ಸುಮಾರು 3,250ಕ್ಕೂ ಅಧಿಕ ಮೀನು ಪ್ರಭೇದಗಳು ದಾಖಲಾಗಿವೆ. ಉಪ್ಪುನೀರು, ಸಿಹಿನೀರು ಹಾಗೂ ಮಿಶ್ರಜಲ ಪ್ರದೇಶಗಳಲ್ಲಿ ವಿವಿಧ ಮೀನು ಜಾತಿಗಳು ಕಂಡುಬರುತ್ತವೆ. ಈ ಕ್ಷೇತ್ರವು ಸುಮಾರು 2.80 ಕೋಟಿ ಜನರಿಗೆ ನೇರ ಹಾಗೂ ಪರೋಕ್ಷ ಉದ್ಯೋಗಾವಕಾಶ ಒದಗಿಸುತ್ತಿದ್ದು, ದೇಶದ ಆರ್ಥಿಕ ಅಭಿವೃದ್ಧಿಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.

ಸಮುದ್ರಾಹಾರ ರಫ್ತು ಕ್ಷೇತ್ರದ ಈ ಸಾಧನೆ ದೇಶಕ್ಕೆ ಹೆಚ್ಚಿನ ವಿದೇಶಿ ವಿನಿಮಯ ತಂದುಕೊಡುವುದರೊಂದಿಗೆ, ಕೃಷಿ ಮತ್ತು ಮೀನುಗಾರಿಕೆ ಆಧಾರಿತ ಆರ್ಥಿಕ ಚಟುವಟಿಕೆಗಳಿಗೆ ಮತ್ತಷ್ಟು ಉತ್ತೇಜನ ನೀಡಿದೆ.