ಸುಳ್ಯ: ಮನೆ, ಅಂಗಳ, ತೋಟ ಎಲ್ಲವೂ ಇದ್ದರೂ ಅವುಗಳಲ್ಲಿ ವಾಸಿಸುವ ಜನರಿಲ್ಲ. ಕರ್ನಾಟಕ–ಕೇರಳ ಗಡಿಗೆ ಹೊಂದಿಕೊಂಡಿರುವ ಆಲೆಟ್ಟಿ ಗ್ರಾಮದ ಕೆಳಗಿನ ಬಟ್ಟಂಗಾಯದಲ್ಲಿ ಕಾಡಾನೆಗಳ ನಿರಂತರ ದಾಳಿಯಿಂದ ಏಳು ಕುಟುಂಬಗಳು ತಮ್ಮ ಊರನ್ನೇ ತೊರೆದಿವೆ.

ಮೇಲಿನ ಹಾಗೂ ಕೆಳಗಿನ ಬಟ್ಟಂಗಾಯ ಕರ್ನಾಟಕದ ವ್ಯಾಪ್ತಿಯಲ್ಲಿದ್ದು, ಕೇರಳದ ಗಡಿಗೆ ಸಮೀಪದಲ್ಲಿದೆ. ಈ ಪ್ರದೇಶದಲ್ಲಿ 30 ಎಕರೆಗೂ ಹೆಚ್ಚು ಕೃಷಿ ಭೂಮಿಯಿದ್ದು, ಕೆಳಗಿನ ಬಟ್ಟಂಗಾಯದ ಏಳು ಕುಟುಂಬಗಳೂ ಅಡಿಕೆ, ರಬ್ಬರ್, ಕರಿಮೆಣಸು ಸೇರಿದಂತೆ ವಿವಿಧ ಬೆಳೆಗಳನ್ನು ಬೆಳೆಯುತ್ತಿದ್ದರು.

ಹಲವು ವರ್ಷಗಳಿಂದ ಕೃಷಿಯನ್ನೇ ನಂಬಿ ಜೀವನ ನಡೆಸುತ್ತಿದ್ದ ಕುಟುಂಬಗಳಿಗೆ ತೋಟವೇ ಪ್ರಮುಖ ಆದಾಯದ ಮೂಲವಾಗಿತ್ತು. ಆದರೆ ಕಳೆದ ಕೆಲವು ವರ್ಷಗಳಿಂದ ಕಾಡಾನೆಗಳ ಸಂಚಾರ ಹೆಚ್ಚಾಗಿದ್ದು, ಹಗಲು-ರಾತ್ರಿ ಎನ್ನದೆ ತೋಟಗಳಿಗೆ ಪ್ರವೇಶಿಸಿ ಬೆಳೆಗಳನ್ನು ನಾಶಪಡಿಸುತ್ತಿವೆ. ತೋಟ ಕಾಯಲು ತೆರಳುವುದೂ ಕುಟುಂಬ ಸದಸ್ಯರಿಗೆ ಅಪಾಯಕಾರಿಯಾಗಿ ಪರಿಣಮಿಸಿದೆ.

ಬೆಳೆಗಿಂತ ಜೀವ ಉಳಿಸಿಕೊಳ್ಳುವುದೇ ಮುಖ್ಯ

ತೋಟಕ್ಕೆ ಆನೆಗಳು ಬಂದಾಗ ಅವುಗಳನ್ನು ಓಡಿಸುವುದು ದೊಡ್ಡ ಸವಾಲಾಗಿದೆ. ವಿಶೇಷವಾಗಿ ವಯೋವೃದ್ಧರು ಹಾಗೂ ಮಹಿಳೆಯರು ಇರುವ ಕುಟುಂಬಗಳಲ್ಲಿ ಆತಂಕ ಹೆಚ್ಚಾಗಿದೆ. ಬೆಳೆ ನಷ್ಟಕ್ಕಿಂತ ಜೀವ ಸುರಕ್ಷತೆ ಮುಖ್ಯ ಎಂಬ ಕಾರಣಕ್ಕೆ ಕಳೆದ ಎರಡು ವರ್ಷಗಳಲ್ಲಿ ಕುಟುಂಬಗಳು ಒಂದೊಂದಾಗಿ ಊರು ತೊರೆಯಲು ಆರಂಭಿಸಿವೆ.

ನಾರಾಯಣ ನಾಯ್ಕ, ರೋಹಿತ್, ನಾರಾಯಣ, ವೆಂಕಟೇಶ ನಾಯ್ಕ, ಪದ್ಮನಾಭ ನಾಯ್ಕ, ಸೀತಾರತ್ನ ಹಾಗೂ ರತ್ನಾಕರ ಅವರ ಕುಟುಂಬಗಳು ಇದೀಗ ಕೆಳಗಿನ ಬಟ್ಟಂಗಾಯದಲ್ಲಿ ವಾಸಿಸುತ್ತಿಲ್ಲ.

ಬಾಡಿಗೆ ಮನೆಯಲ್ಲಿ ಜೀವನ

ಊರು ತೊರೆದ ನಾಲ್ಕು ಕುಟುಂಬಗಳು ಕೇರಳದ ಪಾಣತ್ತೂರಿನಲ್ಲಿ ಬಾಡಿಗೆ ಮನೆಗಳಲ್ಲಿ ನೆಲೆಸಿವೆ. ಮತ್ತೊಂದು ಕುಟುಂಬ ಕಲ್ಲುಗುಂಡಿ ಸಮೀಪ ಸ್ವಂತ ಮನೆ ಮಾಡಿಕೊಂಡಿದೆ. ಸ್ವಂತ ಜಮೀನು, ತೋಟ ಮತ್ತು ಮನೆ ಇದ್ದರೂ ಸುರಕ್ಷತೆಗಾಗಿ ಬೇರೆಡೆ ವಾಸಿಸುವ ಅನಿವಾರ್ಯತೆ ಎದುರಾಗಿದೆ.

ಆದರೂ ತಮ್ಮ ಕೃಷಿ ಭೂಮಿಯೊಂದಿಗಿನ ಸಂಬಂಧವನ್ನು ಕುಟುಂಬಗಳು ಸಂಪೂರ್ಣವಾಗಿ ಕಳೆದುಕೊಂಡಿಲ್ಲ. ಕೆಲವರು ವಾರಕ್ಕೊಮ್ಮೆ ಊರಿಗೆ ಬಂದು ತೋಟದ ಕೆಲಸಗಳನ್ನು ನೋಡಿಕೊಳ್ಳುತ್ತಾರೆ. ಆದರೆ ಅವರ ಅನುಪಸ್ಥಿತಿಯಲ್ಲಿಯೂ ಆನೆಗಳು ತೋಟಕ್ಕೆ ನುಗ್ಗಿ ಬೆಳೆಗಳಿಗೆ ಹಾನಿ ಮಾಡುತ್ತಿವೆ.

ಕೃಷಿಯ ಪರಿಸ್ಥಿತಿ ಉತ್ತಮವಾಗಿದ್ದರೂ ಕಾಡಾನೆಗಳ ಕಾಟವನ್ನು ಸಹಿಸಲು ಸಾಧ್ಯವಾಗದೆ, ಮನೆಯಲ್ಲಿರುವ ವಯೋವೃದ್ಧರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಊರು ಬಿಡಬೇಕಾಯಿತು ಎಂದು ರತ್ನಾಕರ ತಿಳಿಸಿದ್ದಾರೆ.

ಮನೆ ಇದೆ, ಜನರಿಲ್ಲ

ತಲೆಮಾರುಗಳಿಂದ ವಾಸಿಸಿದ್ದ ಮನೆ ಮತ್ತು ಜಮೀನನ್ನು ತೊರೆಯುವುದು ಕುಟುಂಬಗಳಿಗೆ ಸುಲಭದ ನಿರ್ಧಾರವಾಗಿರಲಿಲ್ಲ. ಸ್ವಂತ ಭೂಮಿಯಲ್ಲೇ ಕೃಷಿ ಮಾಡಿಕೊಂಡು ಬದುಕಬೇಕೆಂಬ ಆಸೆ ಇದ್ದರೂ ಕಾಡಾನೆಗಳ ಭೀತಿ ಅದಕ್ಕೆ ತಡೆಯಾಗಿದೆ.

ಕಾಡಾನೆಗಳ ಹಾವಳಿಗೆ ಶಾಶ್ವತ ಪರಿಹಾರ ದೊರೆತು ಸುರಕ್ಷಿತ ವಾತಾವರಣ ನಿರ್ಮಾಣವಾದರೆ ಮಾತ್ರ ಈ ಕುಟುಂಬಗಳು ಮತ್ತೆ ತಮ್ಮ ಊರಿಗೆ ಮರಳುವ ಸಾಧ್ಯತೆ ಇದೆ. ಮನೆ, ತೋಟ ಮತ್ತು ಜಮೀನು ಅಲ್ಲಿಯೇ ಉಳಿದಿವೆ; ಆದರೆ ಅವುಗಳ ನಡುವೆ ಬದುಕಬೇಕಿದ್ದ ಕುಟುಂಬಗಳು ಮಾತ್ರ ಸುರಕ್ಷತೆಗಾಗಿ ದೂರ ಸರಿದಿವೆ.