ಉಪ್ಪಿನಂಗಡಿ: ಯಕ್ಷಗಾನ ಲೋಕದ ಖ್ಯಾತ ಸ್ತ್ರೀವೇಷ ಕಲಾವಿದ ಪಾತಾಳ ವೆಂಕಟರಮಣ ಭಟ್ (92) ಶನಿವಾರ ಸ್ವಗೃಹದಲ್ಲಿ ಹೃದಯಾಘಾತದಿಂದ ನಿಧನರಾದರು. ತೆಂಕು ಮತ್ತು ಬಡಗು ತಿಟ್ಟುಗಳೆರಡರಲ್ಲೂ ಕಲಾಪ್ರದರ್ಶನ ನೀಡಿದ ಅವರು, ರಾಜ್ಯೋತ್ಸವ ಪ್ರಶಸ್ತಿ ಸೇರಿದಂತೆ ಹಲವಾರು ಗೌರವಗಳು ಪಡೆದಿದ್ದರು.

ಮೂಲತಃ ಅಡುಗೆ ಭಟ್ಟರಾಗಿ ವೃತ್ತಿ ಆರಂಭಿಸಿದ ಪಾತಾಳರು, ತಮ್ಮ ಕಲಾಪ್ರತಿಭೆಯಿಂದ ಯಕ್ಷಗಾನದಲ್ಲಿ ಖ್ಯಾತಿ ಗಳಿಸಿದರು. ಕೇವಲ ಮೂರನೇ ತರಗತಿ ಶಿಕ್ಷಣ ಪಡೆದಿದ್ದರೂ 1951ರಲ್ಲಿ ಕಾಂಚನ ನಾಟಕ ಕಂಪನಿಗೆ ಸೇರಿ, ಬಳಿಕ ಪ್ರಧಾನ ಸ್ತ್ರೀವೇಷ ಕಲಾವಿದರಾಗಿ ಕಂಠಪ್ರಭಾವ, ನೃತ್ಯಲಾಸ್ಯದಿಂದ ಭಿನ್ನ ಶೈಲಿ ಕಟ್ಟಿದರು. ಧರ್ಮಸ್ಥಳ (1964-81), ಸೌಕೂರು, ಮೂಲ್ಕಿ, ಸುರತ್ಕಲ್ ಮುಂತಾದ ಪ್ರಸಿದ್ಧ ಮೇಳಗಳಲ್ಲಿ ಪಾಠವಾಡಿದ ಅವರು 1981ರಲ್ಲಿ ನಿವೃತ್ತರಾದರು.

ಬೇಲೂರಿನ ಶಿಲಾಬಾಲಿಕೆಯರ ಅಧ್ಯಯನದಿಂದ ಪ್ರೇರಿತವಾಗಿ ರಂಭೆ, ಸತ್ಯಭಾಮೆ, ದ್ರೌಪದಿ, ಊರ್ವಶಿ ಸೇರಿದಂತೆ ಅನೇಕ ಪಾತ್ರಗಳಲ್ಲಿ ಶ್ರೇಷ್ಠ ಅಭಿನಯ ನೀಡಿದ ಪಾತಾಳರಿಗೆ ರಾಜ್ಯೋತ್ಸವ ಪ್ರಶಸ್ತಿಯ ಜೊತೆಗೆ ಜಾನಪದ ಅಕಾಡೆಮಿ, ಅಗರಿ, ದೇರಾಜೆ ಪ್ರಶಸ್ತಿ ಮುಂತಾದ ಪುರಸ್ಕಾರಗಳು ಲಭಿಸಿದ್ದವು.

ಮೃತರು ಹಿರಿಯ ಪುತ್ರ ಹಾಗೂ ಭಾಗವತ ಅಂಬಾಪ್ರಸಾದ್ ಪಾತಾಳ, ಕಿರಿಯ ಪುತ್ರ ಶ್ರೀರಾಮ ಭಟ್ ಪಾತಾಳ (ಸಿ.ಎ. ಬ್ಯಾಂಕ್ ನಿರ್ದೇಶಕ), ನಾಲ್ವರು ಪುತ್ರಿಯರು, ಮೊಮ್ಮಕ್ಕಳು ಹಾಗೂ ಅಪಾರ ಅಭಿಮಾನಿಗಳನ್ನು ಅಗಲಿದ್ದಾರೆ. ಅವರ ನಿಧನಕ್ಕೆ ಯಕ್ಷಗಾನ ಲೋಕದಲ್ಲಿ ಶೋಕಸಂಚಾರ ಉಂಟಾಗಿದೆ.