ಮಂಗಳೂರು: ಭಾರತದ ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರು ಜುಲೈ 27 ರಂದು, ತಮ್ಮ 124ನೇ 'ಮನ್ ಕಿ ಬಾತ್' ಕಾರ್ಯಕ್ರಮದಲ್ಲಿ ಮಂಗಳೂರು ನಗರದ ಸ್ಪಷ್ಟ ಹಾಗೂ ಶಿಸ್ತಿನ ತಾಂತ್ರಿಕ ಕಸ ವಿಲೇವಾರಿ ಪದ್ಧತಿಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಮಂಗಳೂರು ನಗರವು ತಾಂತ್ರಿಕ ನವೀನತೆಯ ಮೂಲಕ ಉತ್ಕೃಷ್ಟತೆ ಸಾಧಿಸಿದ ಮುಖ್ಯ ನಗರವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ ಎಂದು ತಿಳಿಸಿದರು. ಮಂಗಳೂರು ಮಹಾನಗರ ಪಾಲಿಕೆಯು ಹತ್ತಾರು ವರ್ಷಗಳಿಂದ ಕಸದ ಮರುಬಳಕೆ, ಆಧುನಿಕ ತಂತ್ರಜ್ಞಾನಗಳ ಬಳಕೆ, ಮನೆಮನೆ ಕಸದ ಪ್ರತ್ಯೇಕ ಸಂಗ್ರಹಣೆ, ಜೈವಿಕ ತ್ಯಾಜ್ಯದ ಪ್ರಕ್ರಿಯೆಗೊಳಿಕೆ ಮತ್ತು ಡಿಜಿಟಲ್ ನಿಗಾವಹಣೆ ವ್ಯವಸ್ಥೆಗಳ ಮೂಲಕ ಸ್ವಚ್ಚತೆಯ ಮಾದರಿ ರೂಪಿಸಿರುವುದು ಪ್ರಧಾನ ಮಂತ್ರಿಗಳ ಗಮನ ಸೆಳೆದಿದೆ.

'ಇದು ಕೇವಲ ಮಹಾನಗರ ಪಾಲಿಕೆಯ ಯಶಸ್ಸಲ್ಲ, ಮಂಗಳೂರು ಜನತೆ, ಬೂತ್ ಮಟ್ಟದ ಕಾರ್ಯಕರ್ತರು, ಸ್ವಚ್ಚತಾ ಕಾರ್ಯಕರ್ತರು ಹಾಗೂ ಸ್ಥಳೀಯ ಆಡಳಿತಗಳ ಸಂಯುಕ್ತ ಶ್ರಮದ ಫಲವಾಗಿದೆ' ಎಂದು ದಕ್ಷಿಣ ಕನ್ನಡ ಬ್ಲಾಕ್ ಬಿಜೆಪಿ ಸಂತಸ ವ್ಯಕ್ತಪಡಿಸಿದೆ.

'ಇದು ನಿಜಕ್ಕೂ ಮಂಗಳೂರು ನಾಡಿನ ಜನತೆಗೆ ಹೆಮ್ಮೆಯ ವಿಷಯ. ದೇಶದ ಪ್ರಧಾನ ಮಂತ್ರಿ ಮನ್ ಕಿ ಬಾತ್ ನಲ್ಲಿ ನಮ್ಮ ನಾಡಿನ ಹೆಸರನ್ನು ಉಚ್ಛರಿಸಿದ್ದು, ಇನ್ನು ಮುಂದೆ ತಾಂತ್ರಿಕತೆಯ ಜೊತೆಗೆ ಜನಸಹಭಾಗಿತ್ವದ ಮಹತ್ವವನ್ನು ಬಿಂಬಿಸುವ ಶಕ್ತಿ ನೀಡುತ್ತದೆ' ಎಂದು ಅದು ತನ್ನ ಅಧಿಕೃತ ಪೋಸ್ಟಿನಲ್ಲಿ ತಿಳಿಸಿದೆ.