ನವದೆಹಲಿ: ಪ್ರಕೃತಿ ವಿಕೋಪ, ಭೂಕಂಪ, ಯುದ್ಧ ಅಥವಾ ತುರ್ತು ಪರಿಸ್ಥಿತಿಗಳಲ್ಲಿ ಕೆಲವೇ ನಿಮಿಷಗಳಲ್ಲಿ ಕಾರ್ಯನಿರ್ವಹಿಸಬಲ್ಲ, ಕೇವಲ 4 ಅಡಿ × 6 ಅಡಿ ಗಾತ್ರದ ಭಾರತದ ಪೋರ್ಟಬಲ್ ಆಸ್ಪತ್ರೆ ‘ಭೀಷ್ಮ್ ಕ್ಯೂಬ್ (BHISHM Cube)’ ಇಂದು ಜಗತ್ತಿನ ಗಮನ ಸೆಳೆಯುತ್ತಿದೆ.

ಭಾರತದ ಆರೋಗ್ಯ ಮೈತ್ರಿ (Aarogya Maitri) ಮಾನವೀಯ ನೆರವು ಯೋಜನೆಯಡಿ ಅಭಿವೃದ್ಧಿಪಡಿಸಲಾದ ಈ ವ್ಯವಸ್ಥೆಯನ್ನು ತುರ್ತು ವೈದ್ಯಕೀಯ ನೆರವಿಗಾಗಿ ವಿವಿಧ ದೇಶಗಳಿಗೆ ಕಳುಹಿಸಲಾಗುತ್ತಿದೆ.

ಇತ್ತೀಚೆಗೆ ಭೂಕಂಪದಿಂದ ತತ್ತರಿಸಿರುವ ವೆನೆಜುವೆಲಾಗೆ ಭಾರತ ಭೀಷ್ಮ್ ಕ್ಯೂಬ್‌ಗಳನ್ನು ಹಾಗೂ ವೈದ್ಯಕೀಯ ನೆರವನ್ನು ರವಾನಿಸಿದೆ. ಇದಕ್ಕೂ ಮೊದಲು ಕ್ಯೂಬಾ, ಶ್ರೀಲಂಕಾ ಮತ್ತು ಸೈಪ್ರಸ್ ಸೇರಿದಂತೆ ಹಲವು ರಾಷ್ಟ್ರಗಳಿಗೂ ಈ ತಂತ್ರಜ್ಞಾನ ಆಧಾರಿತ ವೈದ್ಯಕೀಯ ನೆರವು ಒದಗಿಸಲಾಗಿದೆ.

ಈ ಕ್ಯೂಬ್‌ನಲ್ಲಿ ತುರ್ತು ಚಿಕಿತ್ಸೆ, ಸಣ್ಣ ಶಸ್ತ್ರಚಿಕಿತ್ಸೆ, ರೋಗಿಗಳ ಮೇಲ್ವಿಚಾರಣೆ, ಅಗತ್ಯ ವೈದ್ಯಕೀಯ ಉಪಕರಣಗಳು, ಔಷಧಿಗಳು ಹಾಗೂ ವಿವಿಧ ವೈದ್ಯಕೀಯ ಕಿಟ್‌ಗಳನ್ನು ಅಳವಡಿಸಬಹುದಾಗಿದೆ. ಇದರಿಂದ ವಿಪತ್ತು ಸಂಭವಿಸಿದ ಪ್ರದೇಶದಲ್ಲೇ ಅಲ್ಪ ಸಮಯದಲ್ಲಿ ತಾತ್ಕಾಲಿಕ ಆಸ್ಪತ್ರೆಯನ್ನು ಸ್ಥಾಪಿಸುವುದು ಸಾಧ್ಯವಾಗುತ್ತದೆ.

ಭಾರತವು ಕೇವಲ ಔಷಧಿ ಮತ್ತು ಆಹಾರ ನೆರವಷ್ಟೇ ಅಲ್ಲದೆ, ಜೀವ ಉಳಿಸುವ ತಂತ್ರಜ್ಞಾನವನ್ನೂ ವಿಶ್ವದ ಸ್ನೇಹ ರಾಷ್ಟ್ರಗಳೊಂದಿಗೆ ಹಂಚಿಕೊಳ್ಳುತ್ತಿರುವುದು ಗಮನಾರ್ಹವಾಗಿದೆ. ಸಂಕಷ್ಟದ ಸಮಯದಲ್ಲಿ ಮಾನವೀಯ ನೆರವಿನ ಮೂಲಕ ಭಾರತ ತನ್ನ ಜಾಗತಿಕ ಪಾತ್ರವನ್ನು ಮತ್ತಷ್ಟು ಬಲಪಡಿಸುತ್ತಿದೆ.