ಮಂಗಳೂರು: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಮಲ್ಲಿಕಟ್ಟೆ ಶಾಖೆಯಲ್ಲಿ ಸಂಭವಿಸಿದ ಭಾರೀ ಸಾಲ ವಂಚನೆ ಪ್ರಕರಣವನ್ನು ಬೆಳಕಿಗೆ ತರಲಾಗಿದೆ. ಶಾಖೆಯ ಮುಖ್ಯ ವ್ಯವಸ್ಥಾಪಕರಾದ ಸೌರಭ್ ಕುಮಾರ್ ವರ್ಮಾ ಅವರು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ, ಬ್ಯಾಂಕಿನ ಮಾಜಿ ರಿಲೇಶನ್‌ಶಿಪ್ ಮ್ಯಾನೇಜರ್ ಮತ್ತು 14 ಮಂದಿ ಸಾಲಗಾರರು ಸೇರಿಕೊಂಡು MSME ಬಿಸಿನೆಸ್ ನೆಪದಲ್ಲಿ ಸಾಲ ನೀಡಲಾಗಿದೆ ಎಂದು ಆರೋಪಿಸಲಾಗಿದೆ. ಈ ಮೂಲಕ ಬ್ಯಾಂಕ್‌ಗೆ 10.47 ಕೋಟಿ ರೂ.ಗಿಂತ ಹೆಚ್ಚು ನಷ್ಟ ಸಂಭವಿಸಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ದೂರು ಪ್ರಕಾರ, ಜೂನ್ 27, 2022 ರಿಂದ ನವೆಂಬರ್ 20, 2024 ರವರೆಗೆ ಶಾಖೆಯಲ್ಲಿ ಕೆಲಸ ಮಾಡಿದ ಮಾಜಿ ಸಂಬಂಧ ವ್ಯವಸ್ಥಾಪಕ ಅಭಿಷೇಕ್ ನಂದಾ, ಸಾಲ ಮಂಜೂರಾತಿ ಪ್ರಕ್ರಿಯೆಯಲ್ಲಿ ಕಡ್ಡಾಯ ಪರಿಶೀಲನೆ ನಡೆಸದೆ, ಅನೇಕ ವ್ಯಕ್ತಿಗಳಿಗೆ ಸುಳ್ಳು ಅಥವಾ ತಪ್ಪು ದಾಖಲೆಗಳ ಆಧಾರದ ಮೇಲೆ ವ್ಯವಹಾರ ಸಾಲಗಳನ್ನು ಮಂಜೂರು ಮಾಡಿದ ಆರೋಪ ಎದುರಿಸುತ್ತಿದ್ದಾರೆ.

ಸಾಲ ಪಡೆದವರು ಎಲೆಕ್ಟ್ರಾನಿಕ್ಸ್, ಸೌರ ಮೇಲ್ಛಾವಣಿ ಉಪಕರಣ, ಪ್ಲೈವುಡ್ ವ್ಯಾಪಾರ, ಅಡಿಕೆ ವ್ಯಾಪಾರ, ಕೋಳಿ ಆಹಾರ ಉತ್ಪಾದನೆ, ಸೂಪರ್ ಮಾರ್ಕೆಟ್, ಚರ್ಮದ ಸರಕುಗಳ ವ್ಯಾಪಾರ, ಗೃಹೋಪಯೋಗಿ ವಸ್ತುಗಳ ತಯಾರಿಕೆ, ಹೋಟೆಲ್ ಮತ್ತು ರೆಸ್ಟೋರೆಂಟ್ ಸೇರಿದಂತೆ ಹಲವು ವ್ಯವಹಾರಗಳ ಹೆಸರಿನಲ್ಲಿ ಅರ್ಜಿಗಳನ್ನು ಸಲ್ಲಿಸಿದ್ದರು.

ಸಾಲ ಪಡೆದ ಪ್ರಮುಖ ವ್ಯಕ್ತಿಗಳು ಮತ್ತು ಅವರ ವ್ಯವಹಾರ ಹೆಸರಗಳು:ರಿಫಾದ್ ಮೊಹಮ್ಮದ್, ಸೆಫಿಯಾ, ಮಮ್ಮದ್ ಜಿಯಾಮ್ – ಎಲೆಕ್ಟ್ರಾನಿಕ್ಸ್ ವ್ಯಾಪಾರ, ಅಕ್ಷತಾ – ಸೌರ ಮೇಲ್ಛಾವಣಿ ಘಟಕ, ಅನ್ವರ್ ಹುಸೇನ್ – ಪ್ಲೈವುಡ್ ವ್ಯಾಪಾರ, ಅಬ್ಬೋಬಕರ್ ಮತ್ತು ಮುಹಿಯುದ್ದೀನ್ – ಅಡಿಕೆ ವ್ಯಾಪಾರ (ಜಂಟಿ ಸಾಲ), ರಶ್ಮಿತಾ – ಕೋಳಿ ಆಹಾರ ಘಟಕ, ಹೀಬಾ ಹಲ್ಲೆಮಾ – ಸೂಪರ್ ಮಾರ್ಕೆಟ್, ಆಶ್ರಫ್ ಅಬ್ಬಾಸ್ ಬ್ಯಾರಿ, ಸುಷ್ಮಾ – ಚರ್ಮದ ಚೀಲ ಮತ್ತು ಪಾದರಕ್ಷೆ ವ್ಯಾಪಾರ, ಅಕ್ಬರ್ ಸಲಾಂ – ಪ್ಲೈವುಡ್ ಮತ್ತು ಗೃಹೋಪಯೋಗಿ ವಸ್ತುಗಳ ತಯಾರಿಕೆ, ರೈಹನಾಥ್ ಕೆ.ಎ. – ಅಡುಗೆ ಸಾಮಾನು ವ್ಯವಹಾರ, ಮೊಹಮ್ಮದ್ ರಫಾನ್ – ಹೋಟೆಲ್ ಮತ್ತು ರೆಸ್ಟೋರೆಂಟ್.

ಬ್ಯಾಂಕ್‌ ತನಿಖೆಯ ಪ್ರಕಾರ, ಸಾಲ ಪಡೆದವರಲ್ಲಿ ಯಾರೂ ತಮ್ಮ EMI ಅಥವಾ ಕಂತುಗಳನ್ನು ನಿಯಮಾನುಸಾರ ಮರುಪಾವತಿಸಿಲ್ಲ. ಕೆಲವೊಂದು ವ್ಯವಹಾರಗಳು ನಿಜವಾಗಿಯೂ ಕಾರ್ಯನಿರ್ವಹಿಸುತ್ತಿಲ್ಲ ಎಂಬ ಮಾಹಿತಿ ಇದ್ದರೂ, ಮಾಜಿ ಸಂಬಂಧ ವ್ಯವಸ್ಥಾಪಕರು ಅನುಮೋದನೆಗೆ ಶಿಫಾರಸು ಮಾಡಿದ್ದು, ಅರ್ಜಿದಾರರಿಂದ ಹಣಕಾಸಿನ ಲಾಭ ಪಡೆದಿದ್ದಾರೆಯೆಂಬ ಗಂಭೀರ ಆರೋಪವೂ ದೂರಿನಲ್ಲಿ ಇದೆ.

ದೂರುದಾರರ ಪ್ರಕಾರ, ಮಾಜಿ ಸಿಬ್ಬಂದಿ ಮತ್ತು ಸಾಲಗಾರರು ಸೇರಿಕೊಂಡು ಬ್ಯಾಂಕನ್ನು ವಂಚಿಸಲು ಸಂಚು ರೂಪಿಸಿದ್ದು, ಇದರಿಂದ ಮಲ್ಲಿಕಟ್ಟೆ SBI ಶಾಖೆಗೆ ₹10,47,49,868 ನಷ್ಟವಾಗಿದೆ.
ಈ ಹಿನ್ನೆಲೆಯಲ್ಲಿ, ಕ್ರಿಮಿನಲ್ ಬ್ರಿಚ್ ಆಫ್ ಟ್ರಸ್ಟ್, ವಂಚನೆ, ತಪ್ಪು ದಾಖಲೆ ಬಳಕೆ ಮತ್ತು ಸಂಚು ಸೇರಿದಂತೆ ಹಲವಾರು IPC ವಿಭಾಗಗಳಡಿ ಪ್ರಕರಣ ದಾಖಲಾಗಿದೆ.

ಪೊಲೀಸರು ಪ್ರಕರಣ ದಾಖಲಿಸಿರುವುದಾಗಿ ತಿಳಿಸಿದ್ದಾರೆ. ದಾಖಲೆ ಪರಿಶೀಲನೆ, ಸಾಲ ಮಂಜೂರಾತಿ ಪ್ರಕ್ರಿಯೆಯ ವಿಶ್ಲೇಷಣೆ ಹಾಗೂ ಆರೋಪಿಗಳ ಹಣಕಾಸಿನ ಚಲನವಲನಗಳನ್ನು ಪರಿಶೀಲಿಸುವ ಕೆಲಸ ಮುಂದುವರಿದಿದೆ.