ದುಬೈ: ಗಲ್ಫ್ ಪ್ರದೇಶದಲ್ಲಿ ವಿಮಾನ ಸಂಚಾರ ವ್ಯತ್ಯಯಗೊಂಡು ಹಲವು ವಿಮಾನಗಳು ರದ್ದಾದ ಸಂದರ್ಭದಲ್ಲಿ ದುಬೈನಲ್ಲಿ ನೂರಾರು ಭಾರತೀಯರು ಸಿಲುಕಿಕೊಂಡಿದ್ದರು. ಆತಂಕ ಮತ್ತು ಅನಿಶ್ಚಿತತೆಯ ನಡುವಿನ ಆ ಕ್ಷಣದಲ್ಲಿ ಒಬ್ಬ ಉದ್ಯಮಿ ತೋರಿದ ಮಾನವೀಯತೆ ಈಗ ಅನೇಕ ಮಂದಿಯ ಮನಸ್ಸು ಗೆದ್ದಿದೆ.

ರಾಜಸ್ಥಾನ ಮೂಲದ ಉದ್ಯಮಿ ಧೀರಜ್ ಜೈನ್ ಅವರು ಈ ಸಂಕಷ್ಟದ ಸಮಯದಲ್ಲಿ ಸಿಲುಕಿಕೊಂಡಿದ್ದ ಭಾರತೀಯರಿಗೆ ನೆರವಾಗಲು ಮುಂದಾದರು. ದುಬೈ ಮತ್ತು ಸುತ್ತಮುತ್ತ ಪ್ರದೇಶಗಳಲ್ಲಿ ಸಿಲುಕಿದ್ದ ಪ್ರಯಾಣಿಕರಿಗೆ ಸಹಾಯ ಮಾಡಲು ಅವರು ಅಜ್ಮಾನ್‌ನಲ್ಲಿರುವ ತಮ್ಮ ಫಾರ್ಮ್‌ಹೌಸ್‌ನ್ನು ತಕ್ಷಣವೇ ತೆರೆಯುವ ಮೂಲಕ ಆಶ್ರಯ ವ್ಯವಸ್ಥೆ ಮಾಡಿದರು.

ಅಲ್ಲದೆ ನಗರದೆಲ್ಲೆಡೆ 11 ವಾಹನಗಳನ್ನು ಕಳುಹಿಸಿ, ವಿವಿಧ ಸ್ಥಳಗಳಲ್ಲಿ ಸಿಲುಕಿಕೊಂಡಿದ್ದ ಭಾರತೀಯರನ್ನು ಕರೆತರಿಸಿ ಅವರಿಗೆ ಆಹಾರ, ವಿಶ್ರಾಂತಿ ಪಡೆಯಲು ಹಾಸಿಗೆಗಳು ಮತ್ತು ಸುರಕ್ಷಿತ ವಾಸದ ವ್ಯವಸ್ಥೆ ಮಾಡಿದರು. ಸುಮಾರು 200 ಭಾರತೀಯರು ಈ ವ್ಯವಸ್ಥೆಯ ಮೂಲಕ ತಾತ್ಕಾಲಿಕ ಆಶ್ರಯ ಪಡೆದರು.

ನಂತರ ವಿಮಾನ ಸೇವೆಗಳು ಪುನರಾರಂಭವಾದ ಬಳಿಕ ಈ ಪ್ರಯಾಣಿಕರು ಸುರಕ್ಷಿತವಾಗಿ ಭಾರತಕ್ಕೆ ಮರಳಿದ್ದಾರೆ. ಆದರೆ ಸಂಕಷ್ಟದ ಸಮಯದಲ್ಲಿ ತೋರಿದ ಧೀರಜ್ ಜೈನ್ ಅವರ ಮಾನವೀಯ ನಡೆ ಅನೇಕ ಮಂದಿಯ ಹೃದಯವನ್ನು ಸ್ಪರ್ಶಿಸಿದೆ.

ವಿದೇಶದ ನೆಲದಲ್ಲೂ ಒಬ್ಬ ಭಾರತೀಯ ತೋರಿದ ಈ ಸಹಾಯಭಾವ, ಸಂಕಷ್ಟದ ಸಂದರ್ಭದಲ್ಲೂ ಮಾನವೀಯತೆ ಜೀವಂತವಾಗಿದೆ ಎಂಬುದನ್ನು ಮತ್ತೆ ನೆನಪಿಸುತ್ತದೆ.