ಅಮೆರಿಕಾ, ಇಸ್ರೇಲ್ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ತೀವ್ರವಾಗಿದ್ದ ಸಂದರ್ಭದಲ್ಲಿ ಘೋಷಿಸಲಾದ ಎರಡು ವಾರಗಳ ತಾತ್ಕಾಲಿಕ ಯುದ್ಧ ವಿರಾಮದ ಹಿಂದೆ ಯಾರು ಪ್ರಮುಖ ಪಾತ್ರವಹಿಸಿದ್ದಾರೆ ಎಂಬ ವಿಚಾರ ಈಗ ಚರ್ಚೆಗೆ ಗ್ರಾಸವಾಗಿದೆ.
ಇದುವರೆಗೆ ಪಾಕಿಸ್ತಾನ ಮಧ್ಯವರ್ತಿತ್ವ ನಡೆಸಿದೆಯೆಂಬ ಮಾತುಗಳು ಕೇಳಿಬಂದಿದ್ದರೂ, ಇತ್ತೀಚಿನ ರಾಜತಾಂತ್ರಿಕ ವಲಯದ ಮಾಹಿತಿಯ ಪ್ರಕಾರ ಚೀನಾ ನಿಶ್ಶಬ್ದವಾಗಿ ಪ್ರಮುಖ ಪಾತ್ರವಹಿಸಿದ್ದಿರಬಹುದು ಎಂಬ ಅಂದಾಜು ವ್ಯಕ್ತವಾಗಿದೆ.
ಇರಾನ್ನ ಪ್ರಮುಖ ಮಿತ್ರ ರಾಷ್ಟ್ರವಾಗಿರುವ ಚೀನಾ, ಯುದ್ಧದ ಅವಧಿಯಲ್ಲಿ ಬಹಿರಂಗವಾಗಿ ಹೆಚ್ಚಿನ ಪ್ರತಿಕ್ರಿಯೆ ನೀಡದಿದ್ದರೂ, ಅಂತಿಮ ಹಂತದಲ್ಲಿ ನಡೆಸಿದ ಮಾತುಕತೆಗಳು ಮತ್ತು ರಾಜತಾಂತ್ರಿಕ ಒತ್ತಡಗಳ ಮೂಲಕ ಇರಾನ್ ಅನ್ನು ತಾತ್ಕಾಲಿಕ ಒಪ್ಪಂದಕ್ಕೆ ಒಲಿಸಿಕೊಂಡಿರಬಹುದು ಎಂಬ ವಿಶ್ಲೇಷಣೆಗಳು ಹೊರಬಿದ್ದಿವೆ.
ವಿಶೇಷವಾಗಿ, ತೈಲ ಸಾಗಣೆ ಮತ್ತು ಮಧ್ಯಪ್ರಾಚ್ಯದ ಭದ್ರತೆ ಕುರಿತಾಗಿ ಚೀನಾ ಹೊಂದಿರುವ ಹಿತಾಸಕ್ತಿಗಳು ಈ ಮಧ್ಯಸ್ಥಿಕೆಗೆ ಕಾರಣವಾಗಿರಬಹುದು ಎಂದು ಹೇಳಲಾಗುತ್ತಿದೆ.
ಇನ್ನೊಂದೆಡೆ, ಪಾಕಿಸ್ತಾನ ಪಾತ್ರ ಸಂಪೂರ್ಣವಾಗಿ ಅಪ್ರಸ್ತುತವಾಗಿದೆ ಎನ್ನುವುದಿಲ್ಲದಿದ್ದರೂ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚೀನಾದ ಪ್ರಭಾವವೇ ಹೆಚ್ಚು ಪರಿಣಾಮಕಾರಿ ಆಗಿದೆ ಎಂಬ ಅಭಿಪ್ರಾಯಗಳು ವ್ಯಕ್ತವಾಗುತ್ತಿವೆ.
ಈ ನಡುವೆ, ಯುದ್ಧ ವಿರಾಮದ ಮುಂದಿನ ಹಂತ ಹೇಗಿರಲಿದೆ, ಮತ್ತು ಇದರಲ್ಲಿ ಇತರ ರಾಷ್ಟ್ರಗಳ ಪಾತ್ರ ಏನೆಂಬುದನ್ನು ವಿಶ್ವ ಕಾದುನೋಡುತ್ತಿದೆ.
